Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 375 Hüküm no: 659 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Çelebi’nin, evini İbrahim Çelebi b. Sinan’a sattığı Oldur ki Mahrûse-i Üsküdar mahallâtından Hâcce Hâtun mahallesinde sâkin olan İbrahim Çelebi b. Sinan mahfil-i kazâda Hâşimî demekle ma‘rûf Seyyid Mehmed Çelebi b. Mahmud nâm müteveffânın sagīr oğlu Mehmed’e kıbel-i şer‘-i şerîfden vasî nasb olunan Ali Halîfe b. Mahmud mahzarında takrîr-i da‘vâ ettiği mahalle-i mezbûrede vâki‘ bir cânibi merhûm-ı merkūm mülkü ile ve iki cânibi merhûm Rüstem Paşa evkāfından arz-ı hâliye ile ve bir cânibi benim mülküm ile mahdûd ve mümtâz olan evi târih-i kitâbdan on iki yıl mukaddem Sinan’dan altı bin akçeye iştirâ edip bin akçesini teslîm edip zikr olunan evi kabz ettikden sonra ben âhar yere gitmek ile babam merkūm Sinan zikr olunan evi merhûm-ı merkūm Hâşimî Efendi’ye dokuz bin akçeye tekrâr bey‘ eylemiş hâlâ taleb ederim dedikde gıbbe’s-suâl dahi mezbûr zikr olunan evi merhûm-ı mezbûrdan mukaddem aldığın beyân etsin dedikde udûl-i müslimînden Ali Çelebi b. Abdi ve Ahmed Bey b. Mahmud el-cündî edâ-yı şehâdet-i şer‘iyye edip fi’l-hakīka zikr olunan hudûd ile mahdûd olan târih-i kitâbdan on iki yıl mukaddem mezbûr Sinan oğlu mezkûr İbrahim Çelebi’ye altı bin akçeye bey‘ edip teslîm-i mebî‘ ve kabz-ı semen ettim dedikde bu husûsa şâhidleriz şehâdet dahi ederiz dediklerinde ba‘de’t-ta‘dîl hayyiz-i kabûlde vâki‘ oldukdan sonra mezbûr İbrahim Çelebi zikr olunan evi babası merkūm Sinan merhûm Hâşimî Efendi’ye dokuz bin akçeye bey‘ eylediğin işitip bey‘ini kabûl eylemediğine yemîn billâh verildikden sonra zikr olunan ev mezbûr İbrahim Çelebi’ye hükm olunup mâ hüve’l-vâki‘ gıbbe’t-taleb sebt-i sicil olundu. Tahrîren fî evâsıtı Zilka‘de li sene elf. Şuhûdü’l-hâl: Hasan b. Sâdık, Muttalib b. Süleyman, Murad Halîfe b. Abdullah el-hatîb, İsmail b. Sinan, Mehmed b. Mustafa, Abdülhamid [b.] Şahkulu, Abdülhamid [b.] Pîrî Efendi, Mehmed [b.] İlyas, İsa Efendi b. Hızır, Ali Çelebi b. Memi, Mehmed b. Mümin, Mehmed b. Ahmed ve gayruhüm mine’l-hâzırîn