Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 252 Hüküm no: 236 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezmarağda bt. Argir’in kayınpederi Sava v. Peter üzerine açtığı cihaz davasının zaman aşımından dolayı men olunduğu Havâss-ı Refî‘a kazâsına tâbi‘ Kalfalar nâm karye sâkinelerinden olup zâtı ta‘rîf-i şer‘î ile mu‘arrefe olan Ezmarağda bt. Argir nâm Nasrâniye meclis-i şer‘-i hatîr-i lâzımü’t-tevkīrde Bakkāl tâifesinden işbu hâfızü’l-vesîka Sava v. Peter nâm zimmî muvâcehesinde üzerine da‘vâ ve takrîr-i kelâm edip babam hâlik-i mezbûr hayâtında târih-i vesîkadan on beş sene mukaddem beni mezbûr Sava’nın oğlu işbu hâzır bi’l-meclis İstalo nâm zimmîye tezvîc ettikde bana cihâz etmek için mesfûr Sava’ya mâlından yüz guruş def‘ ve teslîm ol dahi ber-vech-i muharrer ahz u kabz ve mesârifine sarfla istihlâk etmeğin mezbûr Sava’ya suâl olunup meblağ-ı mezbûru bana edâya tenbîh olunması matlûbumdur dedikde mesfûr Sava cevâbında husûs-ı mezkûru inkâr eylediğinden mâ‘adâ sinîn-i mezbûrede müdde‘iyye-i mezbûre ile bir mahalde sâkinler olup sükūt dahi etmişdir deyü def‘ edicek gıbbe’l-istintak müdde‘iyye-i mezbûre Ezmarağda ikrâr u i‘tirâf etmeğin bilâ-nizâ‘ on beş sene mürûr eden da‘vânın bilâ-emr-i sultânî istimâ‘ı memnû‘ olmağla ber-vech-i muharrer müdde‘iyye-i mezbûre bî-vech mu‘ârazadan men‘-birle mâ-vaka‘a bi’t-taleb ketb olundu. Fî 16 Cemâziyelâhir sene [1]143. Şuhûdü’l-hâl: es-Seyyid Mustafa b. Ahmed, Mustafa Beşe b. Ali, İbrahim Çelebi b. Mustafa, Ali Çelebi b. Mehmed, Papa Yanaki v. Tanaş, Papa İstator v. ( ), Tomo v. Yani, Vasilaki v. Franko, Franko v. ( ).