Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 252 Hüküm no: 237 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ali Ağa b. Mehmed’in köle olarak kullandığı Sâliha’ın hür olduğunun anlaşıldığı Sâbıkā rıkka inkıyâdı olmağla zikri âtî da‘vâya kıbel-i şer‘den me’zûn olan orta boylu açık kaşlı, sarı elâ gözlü bâ‘isetü’l-vesîka Sâliha meclis-i şer‘-i şerîf-i enverde Devlet-i aliyye’de sâbıkā kasabbaşı olup bundan akdem vefât eden Mehmed Ağa b. el-Hâc Ali b. el-Hâc Hüseyin’in hasren vârisi olup kendi nefsinden asîl ve sulbî sagīr oğlu Abdülbâki’nin tesviye-i umûruna vasiyy-i şer‘î ve müteveffâ-i merkūmun terekesine bi’l-verâse ve bi’l-vesâye vâzı‘u’l-yed olan Fâtıma bt. Ali Ağa b. Mehmed tarafından husûs-ı âti’l-beyâna vekîl olduğu Molla Halil b. Mustafa ve Musa b. Mehmed nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan es-Seyyid Mustafa Efendi b. Halil Efendi mahzarında üzerine da‘vâ ve takrîr-i kelâm edip ben diyâr-ı Kırım’da Koçay karyesi ahâlîsinden hürrü’l-asl el-Hâc Ali b. Ahmed b. Mehmed’in firâşından hâsıla ve zevce-i menkûhası hürretü’l-asl Ümmühani bt. el-Hâc Ali b. Murad nâm hatundan mütevellide olup [51a] bana ve ebeveynim mezbûrâna kat‘â rık târî olmayıp ben hürretü’l-asl iken müvekkile-i mezbûre bana rık olmak üzere bi-gayr-ı hakkın vaz‘-ı yed eder suâl olunup kasr-ı yedine tenbîh ve sebîlim tahliyye olunmak matlûbumdur dedikde gıbbe’s-suâl vekîl-i mezbûr cevâbında mevsûfe-i mezbûreye tereke-i müteveffâ-i merkūmdan olup rık olmak üzere bi’l-verâse ve bi’l-vesâye bi-hakkın vaz‘-ı yed eder deyü müvekkilesinin vaz‘-ı yedini ikrâr lâkin mevsûfe-i mezbûrenin ber-vech-i muharrer hürretü’l-asl olduğunu inkâr edicek mevsûfe-i mezbûreden ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve fi’l-asl Gözleve ve Aşan karyeleri ahâlîsinden olup mahmiye-i mezbûrede Elçi Hanı’nda müsâfiren sâkin Ali b. Çanaki ve Abdullah b. Muslu nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mevsûfe-i mezbûre Sâliha sâlifü’z-zikr Koçay karyesi ahâlîsinden hürrü’l-asl el-Hâc Ali b. Ahmed b. Mehmed’in firâşından hâsıla ve zevce-i menkûhası hürretü’l-asl Ümmühani bt. el-Hâc Ali b. Murad nâm hatundan mütevellide olup kendiye ve ebeveyni mezbûrâna kat‘â rık târî olmayıp mevsûfe-i mezbûre hürretü’l-asldır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ekdikde kıbel-i şer‘den irsâl olunan Müezzinzâde Mehmed Efendi şâhidân-ı mezbûrânın sâkine oldukları hâne-i mezbûra varıp vukūfu olan bî-garaz Müslimînden mazbûtü’l-esâmî on beş nefer kimesneden keyfiyet-i hâllerin suâl eyledikde mezbûrândan her biri adl ve makbûlü’ş-şehâde idiklerini ihbârların mevlânâ-yı mezbûr mahallinde tahrîr ba‘dehû ma‘an ba‘s olunan ümenâ-i <<şer‘le>> mahkeme ile gelip haber vermekle emr-i ta‘dîl ve’t-tezkiye tamam ve şehâdetleri makbûle olmağın mûcebince ba‘de’l-hükm ve’t-tenbîh sebîli tahliyye olunup mâ-vaka‘a bi’t-taleb ketb olundu. Fî 17 Cumâdelâhire sene [1]143. Şuhûdü’l-hâl: Mehmed Ağa b. Hasan, el-Hâc Mahmud b. Hasan, Hasan b. Ahmed, Ahmed b. İbrahim, Ali b. Hasan, el-Hâc Yusuf b. Abdullah, Ali b. Musa, İbrahim b. Mehmed, Mehmed b. İbrahim, Mehmed b. Ahmed, el-Hâc Ali b. Mehmed, el-Hâc Mahmud muhzır, İbrahim b. Mustafa.