Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 253 Hüküm no: 238 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. İvaz’ın Rukiye bt. Abdullah ile muhala‘a yoluyla boşandıkları ve birbirlerinin zimmetlerini ibra ettikleri İsbât-ı muhâla‘a. Mahmiye-i İstanbul’da Gül Câmi‘-i şerîfi kurbünde sâkine Rukiye bt. Abdullah nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde İbrahim Çelebi b. İvaz mahzarında üzerine da‘vâ ve takrîr-i kelâm edip mezbûr İbrahim Çelebi zevcim olup beynimizde hüsn-i mu‘âşeretimiz olmamağla târih-i kitâbdan yirmi gün mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan yirmi guruş mehr-i müeccelimi mezbûr İbrahim Çelebi’den taleb eylediğimde bana edâ ve teslîmden imtinâ‘ eder suâl olunsun dedikde gıbbe’s-suâl mezbûr İbrahim Çelebi cevâbında fi’l-hakīka müdde‘iyye-i mezbûreyi tatlîk eylediğini ikrâr lâkin mezbûre Rukiye Hatun yirmi guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere muhâla‘a-i sahîha-i şer‘iyye ile muhâla‘a olduğumda ben dahi hul‘-ı mezbûru kabûl eylediğimden sonra müdde‘iyye-i mezbûre Rukiye Hatun hukūk-ı zevciyyete müte‘allika âmme-i da‘vâdan benim zimmetimi ibrâ ve iskāt eyledi deyü def‘le mukābele edicek gıbbe’l-istintak ve’l-inkâr mezbûr İbrahim Çelebi’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sâkinlerinden İmâm es-Seyyid İbrahim Efendi b. Abdülfettâh, ve Müezzin Mustafa Halîfe b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iyye-i mezbûre Rukiye Hatun yirmi guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere târih-i kitâbdan yirmi gün mukaddem mezbûr İbrahim Çelebi ile muhâla‘a-i sahîha-i şer‘iyye ile muhâla‘a olduğunda ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan mezbûre Rukiye Hatun bizim huzûrumuzda mezbûr İbrahim Çelebi’nin zimmetini ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eyledikde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iyye mezbûre bî-vech mu‘ârazadan men‘-birle mâ-vaka‘a bi’t-taleb ketb olundu. Fî 13 min-Cemâziyelâhir sene [1]143. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Abdullah b. Hasan, Mehmed b. Ahmed.