Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 393 Hüküm no: 701 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erdoğdu Bey’in, çiftliğini Mustafa Efendi b. Hacı Mehmed’e sattığı Budur ki Hâlâ Uşak nâzırı olan Erdoğdu Bey mahfil-i kazâda bâ‘isü’l-hurûf kıdvetü’l-mülâzimîn Mustafa Efendi b. Hacı Mehmed mahzarında ikrâr ve takrîr-i kelâm edip târih-i kitâbdan iki yıl mukaddem kasaba-i Gekvize’de vâki‘ inde’l-ahâlî ma‘lûmü’l-hudûd mülk evimi cemî‘ tevâbi‘ ve levâhıkıyla ve mülk menzilimi cemî‘ tevâbi‘iyle ve iki kıt‘a bahçemi ve bir kıt‘a bağımı ve üç kavak sınırında vâki‘ inde’l-ahâlî ma‘lûmü’l-hudûd çiftliğimi yetmiş bin akçeye bey‘ edip ve zikr olunan çiftliğe müte‘allik olan tahmînen üç yüz dönüm yerimi sâhib-i arz ma‘rifetiyle mezbûr Mustafa Efendi’ye tefvîz edip cem‘an sekiz bin akçeyi alıp kabz edip teslîm-i mebî‘ edip ol zamândan beri vekâleten mezbûr Mustafa Efendi için tasarruf ederim zikr olunan ev ve bağ ve bahçeler ve yer mezbûrun mülk-i sarîhidir kat‘â medhalim yokdur dedikde mukırr-ı mezbûr Erdoğdu’nun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk edip mâ vaka‘a bi’t-taleb tahrîr olundu. Şuhûdü’l-hâl: Kıdvetü’l-kuzât Şaban Efendi b. Hamza, Hüseyin Çavuş Dergâh-ı âlî, İsmail Çavuş Dergâh-ı âlî, Osman Bey Çavuş-ı Şehzâde-i civân-baht, Veli b. Tevhid, Murtaza Bey b. Nurullah, İsa Efendi el-müderris ve gayruhüm