Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 397 Hüküm no: 712 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Sinan Subaşı’nın, yeğeni Ayşe bt. Hasan’a bir cariye bıraktığı Budur ki Derviş Mehmed b. Ali mahfil-i kazâda mahrûse-i Üsküdar’da sâkine olan Ayşe bt. Hasan nâm hâtun tarafından da‘vâ ve kabz ve îsâle vekîl olup vekâleti nehc-i şer‘î üzre sâbite olan zevci Hüseyin Bey el-cündî mahzarında takrîr-i da‘vâ edip mezbûre Ayşe’nin yedinde Yasemin nâm câriye ammim Sinan Subaşı’nın olup vefât ettiği bana intikāl eylemiş iken hâlen mezbûre fuzûlî tasarruf eder taleb ederim dedikde gıbbe’s-suâl mezbûr Hüseyin Bey cevâb verip zikr olunan câriyeyi bundan akdem Sinan Subaşı vefât ettikde mezbûr Ayşe’ye zikr olunan nikâhı için vermişlerdir mezbûrenin mülküdür dedikde takrîrine muvâfık beyyine taleb olundukda udûl ve sikātden Sefer Hoca b. İlyas ve Hüseyin Bey el-cündî edâ-yı şehâdet-i şer‘iyye edip fi’l-hakīka merkūm Sinan Subaşı vefât ettikde mezbûre Ayşe’ye zikr olunan câriyeyi nikâhı için mezbûrenin mülküdür bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mâ vaka‘a bi’t-taleb tahrîr olundu. Şuhûdü’l-hâl: Müstedâm Bey el-cündî, Müstecâb b. Mustafa, Şaban Efendi el-kadı ve gayruhüm Yevmü’s-sebt es-sâbi‘ ve’l-ışrîn min Zilka‘deti’l-harâm li sene elf