Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 408 Hüküm no: 737 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefil olma Koçhisar kazâsından olup hâlâ mahmiye-i Kostantıniyye sâkinlerinden olan işbu kumral, orta boylu, kara gözlü, Sefer b. Satılmış nâm kimesne mahfil-i kazâda Dergâh-ı âlî çavuşlarından fahrü’l-emâsil ve’l-akrân ( ) Çavuş b. ( ) mahzarında ikrâr ve i‘tirâf edip mezbûr Çavuş’un yine Dergâh-ı âlî çavuşlarından Muharrem Çavuş’un üç bin nakd râyic fi’l-vakt akçesi olup meblağ-ı mezbûra ben kefîl oldum şol şartla ki târih-i kitâbdan altmış gün mehil ile verile deyicek mûmâileyh çavuş dahi fi’l-hakīka târih-i kitâbdan altmış güne dek va‘de[ye] râzı oldum dedikde mukırr-ı mezbûrun vech-i meşrûh üzre olan ikrârını bi’l-muvâcehe tasdîk eylediği kayd olundu. Şuhûdü’l-hâl: Murtaza b. Ali Efendi, Fahrü’l-müderrisîn Mustafa, Ahmed Bey b. Mustafa ve gayruhüm Yevmü’s-sebt fi’l-yevmi’l-hâmis min şehri Zilhicceti’ş-şerîfe sene elf