Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 409 Hüküm no: 738 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî b. Balık Memi’nin, halasından kalan bahçeyi Mustafa b. Ahmed’e sattığı Budur ki Vilâyet-i Anadolu’da İznik kazâsına tâbi‘ Marga nâm karye sükkânından olup hâlen mahrûse-i Üsküdar’da sâkin olan Pîrî b. Balık Memi mahfil-i kazâda bâ‘isü’l-hurûf Mustafa b. Ahmed mahzarında ikrâr ve takrîr-i kelâm edip karye-i mezbûrede vâki‘ bir tarafı Receb mülkü ile ve bir tarafı Arabacı Memi mülkü ile ve bir tarafı Cafer Bey er-râcil mülkü ile ve tarîk-i âm ile mahdûd olan halam Fâtıma’dan bana irs-i şer‘le intikāl eden mülk bahçemi cemî‘ tevâbi‘ ve levâhıkıyla mezbûr Mustafa’ya iki bin nakd râyic fi’l-vakt akçeye bey‘ edip teslîm-i mebî‘ ve kabz-ı semen kıldım keyfe mâ yeşâ mutasarrıf olsun dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Kıdvetü’l-akrân Ali Subaşı yayabaşıyân-ı hâssa, Sinan Subaşı an Zümre-i zağarcıyân-ı hâssa, El-Hâc Hüseyin [b.] Mustafa, Muttalib [b.] Süleyman, Kalaycı Mehmed b. Yunus ve gayruhüm