Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 263 Hüküm no: 248 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı esnafına Ahmed Çelebi b. Abdurrahman’ın kethüda tayini Kethüdâlık hücceti. Mahmiye-i İstanbul’da vâki‘ boyacı hırfetinin yiğitbaşıları Mustafa Çelebi b. Mehmed ve erbâbından el-Hâc Ali b. İsmail ve Mustafa Çelebi b. Ahmed ve Süleyman Çelebi b. Mehmed ve Halil Çelebi b. Mehmed ve Ahmed Çelebi b. Halil ve Osman Çelebi b. Hasan ve Süleyman Çelebi b. Hüseyin ve Ahmed Çelebi b. Mustafa ve Hüseyin Beşe b. Mahmud ve Abdülkerim b. Ali ve Mustafa Çelebi b. Osman ve el-Hâc Mehmed b. el-Hâc Ali ve Mehmed Çelebi b. İsmail ve İsmail Çelebi b. Hasan ve Süleyman Çelebi b. Ali ve İsmail Çelebi b. İvaz ve İbrahim Çelebi b. Mustafa nâm kimesneler ile hırfet-i mezkûreden Yiğitbaşı Todori v. Kalot ve Rado v. Yanaki ve Mihal v. Dimitri ve Kostantin v. Yanaki ve Dimo v. Yorgi ve Hristo v. Kosti ve Ustoyan v. Kaloti ve Yanaki v. Çerçi ve Kalo Yani v. Yorgi ve Biyo v. Kosta ve sâirleri meclis-i şer‘-i şerîf-i enverde hırfet-i mezkûre ihtiyârlarından bâ‘isü hâze’l-kitâb Ahmed Çelebi b. Abdurrahman nâm kimesne mahzarında her biri takrîr-i kelâm ve bast-ı merâm edip sâbıkā kethüdâmız olan işbu hâzır bi’l-meclis es-Seyyid İbrahim Çelebi b. Mustafa nâm kimesne mevâni‘-i kesîresinden nâşî kethüdâlık umûrunu ikāmetten izhâr-ı acz-birle kasr-ı yed etmeğin mezbûr Ahmed Çelebi mütedeyyin ve mustakīm ve kethüdâlık umûrunu kemâ-hüve hakkuhû edâ ve îfâya kādir ve min-külli’l-vücûh muhtârımız olmağla nizâm-ı hâlimiz için mezbûr Ahmed Çelebi kıbel-i şer‘den üzerimize kethüdâ nasb ve ta‘yîn ve yedine vesîka tahrîr ve i‘tâ olunmak matlûbumuzdur dediklerinde mukırr-ı mezbûrûnun nizâm-ı hâlleri için iltimâslarıyla mezbûr Ahmed Çelebi kıbel-i şer‘den üzerlerine kethüdâ nasb ve ta‘yîn olundukda ol dahi kabûl ve hizmet-i lâzimesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 22 Cemâziyelâhir sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, İbrahim Çelebi b. Mustafa, Ya‘kub b. Abdullah, Duhânî Mehmed Çelebi