Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 263 Hüküm no: 249 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Ramazan ile el-Hâc Ömer Ağa b. Mehmed’in mukataa iltizamından dolayı olan davada sulh oldukları Mahmiye-i İstanbul’da Davudpaşa Mahallesi’nde sâkin Hüseyin Ağa b. Ramazan nâm kimesne meclis-i şer‘-i hatîr-i lâzımü’t-tevkīrde işbu hâfızü’l-kitâb el-Hâc Ömer Ağa b. Mehmed mahzarında ikrâr-ı tâm ve takrîr-i kelâm edip mezbûr el-Hâc Ömer Ağa’nın uhdesinde olup Ankara sancağında Şehir nâhiyesinde Rumeli perâkendesi mukāta‘ası ve korucular tımarını [bin yüz] otuz üç ve otuz dört senelerinde beş yüz on guruş bedel-i makbûza bana ilzâm edip ben dahi ber-vech-i muharrer iltizâm eylediğimden sonra zikrolunan mukāta‘a ve tımarı ancak bir sene zabt edip bedel-i mezkûrdan yüz altmış beş guruşunu istîfâ etmemle ber-vech-i muharrer istîfâ olunmayan meblağ-ı mezbûr yüz altmış beş guruşu mezbûr el-Hâc Ömer Ağa’dan taleb ve da‘vâ eylediğimde beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûr el-Hâc Ömer Ağa ile otuz guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu mezbûr el-Hâc Ömer Ağa yedinden tamamen ahz u kabz eyledim husûs-ı mezbûre ve mâ‘adâsı olan yüz otuz guruşa müte‘allika âmme-i da‘vâ ve kâffe-i mütâlebâtdan mezbûr el-Hâc Ömer Ağa’nın zimmetini ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Cumâdelâhire sene [1]143. Şuhûdü’l-hâl: Mahmud Efendi b. Kemaleddin, Ahmed Halîfe b. Mahmud, el-Hâc Mehmed b. Mustafa, Ahmed Halîfe b. Mehmed Efendi, Mehmed Çelebi b. Abdullah, es-Seyyid Abdi Çavuş, Kādızâde Mustafa du‘âcı.