Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 264 Hüküm no: 250 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in kocası Miskçi Ahmed’in vefâtını şahitler ile ispat ettiği İstihbâr. Mahmiye-i İstanbul’da Sultan Bayezid Mahallesi’nde sâkine olup zâtı Mehmed b. Osman ve Abdullah b. Ahmed ta‘rîfleriyle mu‘arrefe olan işbu bâ‘isetü’l-vesîka Ümmügülsüm bt. Mehmed nâm hatundan ber-vech-i âtî istihbâr-ı şer‘î sudûrundan sonra udûl-i Müslimînden olup medîne-i Tire sâkinlerinden mahalle-i mezbûrede müsâfiren sâkin es-Seyyid Ömer b. Receb ve Ahmed b. Mahmud nâm kimesneler li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Ümmügülsüm Hatun’un zevci Miskçi Ahmed b. Mustafa b. Yusuf târih-i vesîkadan kırk beş gün mukaddem medîne-i mezkûrede bi-emri’llâhi te‘âlâ vefât edip biz cenâzesinde hâzır olup defneyledik deyü her biri alâ-tarîkı’ş-şehâde haber vermeleriyle hıfzan li’l-makāl mâ-vaka‘a bi’t-taleb ketb olundu. Fî 24 Cumâdelâhire sene [1]143. Şuhûdü’l-hâl: İbrahim b. Mustafa, Mehmed b. Ahmed, Ahmed b. Şa‘ban.