Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 439 Hüküm no: 813 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gayr-i müslim tezgahtarların temiz olmadıkları gerekçesiyle Müslüman bakkallarında çalıştırılmalarının yasaklanması Budur ki Mahrûse-i Üsküdar sükkânından Mehmed Bey el-cündî ve Şah Bey el-cündî ve Musli b. Hüseyin ve Sefer Hoca el-müezzin ve sâir ahâlî-i mahrûse-i mezbûre mahfil-i kazâda mahrûse-i mezbûreden bâzârbaşı olan Mirzâ b. İbrahim ve bakkalların yiğitbaşısı olan Zülfikar ve sâir bâzârcılar mahzarlarında takrîr-i kelâm edip bundan akdem zikr olunan bakkal tâ‘ife[si] dükkânlarında kāfirleri istihdâm edip mezbûrlar dahi murdar nesneye yapışıp ellerin pâk etmeyip Müslümanlara elleriyle bal ve yağ ve sâir me’kulât bey‘ edip men‘ olunmak için fetvâ-yı şerîfe ve emr-i münîf ihrâc edip şer‘le men‘ olunmuş iken hâlâ memnû‘ olmayıp yine istihdâm ederler men‘ olunmasın taleb ederiz dediklerinde mezbûrların yedlerinde olan emr-i şerîf ve fetvâ-yı münîf takrîrlerine muvâfık olmağın ba‘dehû zikr olunan bakkal tâifesi kāfirleri tezgahtar etmemek için kıbel-i şer‘den tenbîh olunup ve mâ hüve’l-vâki‘ bi’t-taleb tahrîr olundu. Şuhûdü’l-hâl: es-Sâbikūn