Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 444 Hüküm no: 823 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borcundan zindanda ölen Drako v. Mihal’in terekesinin borçlarına yetmediği Budur ki Bundan akdem kesret-i düyûn için habs olunup iki yıl mikdârı zindanda yatıp mürd oldukda cümle metrûkâtı düyûnunu ihâta etmeyip guremâya muhtâc olan Kadıköyü nâm karyeden Drako v. Mihal nâm zimmî zimmetinde Şah Mehmed el-Fenârî evkāfına sâbıkan mütevellî olan Maksud mu‘âmelesiyle yirmi yedi bin akçesi olup hîn-i guremâda on üç bin beş yüz akçe âid ve râci‘ olup ve Yusuf el-Fenârî evkāfına mütevellî olan Maksud el-mezbûr mu‘âmelesiyle altı bin akçesi olup hîn guremâda üç bin akçe âid olmağın zikr olunan evkāfa hâlâ mütevellî olan fahrü’l-akrân Ali Çelebi b. Yusuf el-Fenârî nâm kimesneye zikr olunan cem‘an iki vakfın on altı bin beş yüz akçesi teslîm olunup ve temessük iltimâs etmeğin bu hurûf tahrîr olundu. Şuhûdü’l-hâl: El-Hâc Hüseyin [b.] Mustafa, Mehmed b. Behrâm, Müstedâm Bey el-cündî, Muttalib [b.] Süleyman ve gayruhüm