Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 444 Hüküm no: 824 Orijinal metin no: [78b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fenârî Vakfı’na borçlarından dolayı zindanda kalan Got v. Yorgi ve Mihal v. Dimitri’nin müflisen öldükleri Merhûm Fenârî evkāfından Şah Mehmed Efendi evkāfına bi’l-fi‘l mütevellî olan râfi‘ü’l-kitâb fahrü’l-akrân Ali Çelebi b. Yusuf el-Fenârî mahfil-i kazâya gelip takrîr-i kelâm edip mahrûse-i Üsküdar’da Kadıköyü nâm karye sükkânından Mihal v. Dimitri zimmetinde mütevellî-yi sâbık mu‘âmelesiyle yedi bin akçe vâsıl olup ve karye-i mezbûreden Got v. Yorgi zimmetine yine mütevellî-yi sâbık mu‘âmelesiyle üç bin akçe vâsıl olup mezbûrân Mihal ve Got’tan tahsîl mümkün olmamağın izn-i hâkim ile habs olunup iki yıl mikdârı yatıp müflisen helâk olup ve mezbûr Hristodoloz müflisen firâr edip bir akçe değer esbâb ve emlâki kalmamışdır ehl-i vukūf ve bî-garaz Müslümanlardan suâl olunup vukû‘ı üzre tahrîr olunmasın taleb ederim dedikde udûl ve sikātdan Ali Halîfe b. Mahmud el-imâm ve Seyyid Halil b. es-Seyyid İbrahim ve Mehmed b. Hüsam ve sâir cemm-i gafîr mahfil-i kazâya hâzırûn olup fi’l-hakīka mezbûrân Mihal ve Got vakf-ı merkūma medyûnen mahbûs olup iki yıla karîb hapisde müflisen mürd olup bir akçe değer esbâb ve erzakdan şeyi kalmamışdır ve merkūm Hristodoloz firâr edip bir akçeyi değer şeyi kalmamışdır deyu alâ tarîki’ş-şehâde haber verdiklerinde mâ vaka‘a mezbûr Ali Çelebi iltimâsıyla tahrîr olundu. Şuhûdü’l-hâl: Kıdvetü’l-akrân Hamza Subaşı yayabaşıyân-ı hâssa, Müstedâm Bey el-cündî, el-Hâc Hüseyin [b.] Mustafa, Muttalib [b.] Süleyman ve gayruhüm