Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 455 Hüküm no: 849 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yani’nin kızı Marula’ya hibe ettiği evin tasarrufuna Yani’nin oğlunun engel olmaması Budur ki Kartal nâm karye sâkinlerinden olup bundan akdem mürd olan Yani nâm zimmînin oğlu Maskalari nâm zimmî mahfil-i kazâda mürd-i mezbûrun kızı Marula nâm zimmîye tarafından da‘vâya vekîl olup vekâleti Vardi v. Manol ve Yorgi v. Yorgi nâm zimmîler şehâdetleriyle sâbitü’l-vekâle olan zevci Kostantin v. Dimitri nâm zimmî mahzarında takrîr-i da‘vâ edip karye-i mezbûrede vâki‘ babamdan bana ve mezbûra irs-i şer‘le intikāl eden bir tarafı Erine ve bir tarafı Todoro v. Lakori mülkleriyle ve iki tarafı tarîk-i âm ile mahdûd ve mümtâz olan bir bâb fevkānî evi altında ahırı ve hayâtı ve tahta pûşu müştemil olan mülk evden bana hissemi vermeyip fuzûlî tasarruf eder hissemi taleb ederim dedikde gıbbe’s-suâl mezbûr dahi fi’l-hakīka zikr olunan hudûd ile mahdûd olan ev mezbûrun babası Yani’nindir lâkin hâl-i hayâtında hibe ve temlîk etmişdir ol andan beri tasarrufundadır dedikde mezbûr Kostantin’den takrîrine muvâfık beyyine taleb olundukda udûl ve sikātdan Hüseyin [b.] Behrâm ve Hasan [b.] Sâdık nâm kimesneler edâ-yı şehâdet-i şer‘iyye edip fi’l-hakīka mürd-i mezbûr hâl-i hayâtında zikr olunan evi mezbûrun müvekkilesi mezbûre Marula’ya hibe ve temlîk eyleyip mezbûre dahi kabz edip ol zamândan beri tasarrufundadır dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mezbûr Maskalari mu‘ârazadan men‘ olunup ve mâ hüve’l-vâki‘ bi’t-taleb tahrîr olundu. Şuhûdü’l-hâl: Mehmed b. Behrâm, Müstecâb [b.] Mustafa, Mustafa [b.] Mehmed ve gayruhüm