Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 456 Hüküm no: 850 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Bey b. Abdurrahman ile Müezzin Ahmed Halîfe b. Abdülvehhâb’ın, ortak aldıkları yeri paylaştıkları Mahmiye-i Galata’ya tâbi‘ Tophâne’de Mustafa Ağa mahallesinden olup Dergâh-ı âlî bevvâblarından fahrü’l-akrân Kasım Bey b. Abdurrahman mahfil-i kazâya yine mahalle-i mezbûreden olan Müezzin Ahmed Halîfe b. Abdülvehhâb mahzarında ikrâr ve takrîr-i merâm kılıp mahrûse-i Üsküdar’da Bülbül Deresi nâm mevzi‘de bundan akdem Dergâh-ı âlî çavuşlarından fahrü’l-akrân Lütfi Çavuş yedinden elli bin akçeye ber vech-i iştirâk bir mikdâr yer almışdık hâlâ kendimiz bî-garaz müslimûn ile zikr olunan yerin üzerine varılıp taksîm olundukda mezbûr Ahmed Halîfe’ye cânib-i şarkîde Hasan Bâzârbaşı ile Mehmed Usta bağlarıyla ve benim bağımla ve tarîk-i âmla mahdûd olup on beş akçe kulluklu yeri merkūmun hissesine tutup benim aldığım yer ziyâde ve iyi olduğu ecilden iki bin beş yüz akçe dahi verdim kendi dahi râzı oldu deyicek mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm bi’l-muvâcehe tasdîk ve’l-müşâfehe tahkīk eyledikde bu hurûf ketb u tahrîr olundu. Şuhûdü’l-hâl: Ali b. Abdullah es-Sivasî, Ömer Bey b. Abdullah, ve Mustafa Bey er-râcil, Hasan Bâzârbaşı b. Mustafa, Yusuf b. Abdullah, Yeniçeri Mustafa, Mehmed Bey, Hüsrev Bey ve gayruhüm