Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 463 Hüküm no: 867 Orijinal metin no: [83a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Macar Ali b. Abdullah’ın, Yeniçeri Mehmed b. Abdullah’ı bıçakla yaraladığı Mahrûse-i Üsküdar sâkinlerinden olup sol tarafından mecrûh olan Dergâh-ı âlî yeniçerilerinden Mehmed b. Abdullah nâm kimesnenin husûs-ı âtîye nehc-i şer‘î ile vekâleti sâbite olan zevcesi Aynî bt. el-Hâc Hasan mahfil-i kazâda ebnâ-i sipâhiyândan Macar Ali b. Abdullah mahzarında takrîr-i da‘vâ kılıp mezbûr Mehmed Bey benim zevcimi Kadıköy kurbunda yolum basıp sol tarafından mecrûh eylediğinden mâ‘adâ yanından dört bin akçesin almış vekâleten taleb eylerim dedikde gıbbe’s-suâl kavga edip düştük ama vurmadım ve akçesin almadım deyicek müdde‘iyye-i mezbûrenin da‘vâsına muvâfık beyyine taleb olundukda udûl-i müslimînden Osman b. Ahmed ve Bevvâb-ı sultânî Kasım Bey b. Abdullah nâm kimesneler meclis-i şer‘a li ecli’ş-şehâde hâzırân olup fi’l-hakīka müdde‘iyye-i mezbûrenin zevci mezbûr Mehmed Yeniçeri’yi işbu merkūm Ali Bey nâm sipâhi bıçak ile sol tarafından koltuğu altında darb edip mecrûh eyledi bu husûsa şâhidleriz şehâdet ederiz ve orda yasakçı olan Mustafa Yeniçeri bıçağı elinden alıp vaktinde dahi belinden aldı deyip fi’l-hakīka mezbûr yasakçı ve ba‘zı kimesneler bıçağı elinden aldık ama vurduğun da görmedik deyip mezbûr Sipâhi-i bevvâb Kasım Bey’e cerhim vardır fâsıkdır ol vakit sarhoş idi deyicek cerha şâhid için mehil-i şer‘î verilip mâ vaka‘a kayd şud mehiline vefâ etmeyip sicil şud. Şuhûdü’l-hâl: Ahmed Çavuş, Mustafa b. Pîrî, Müstedâm Bey, Hasan b. Sâdık, Şemseddin b. Sâdık