Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 271 Hüküm no: 258 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Fazlı’nın boşandığı kocasından mehr-i müeccelini ve tayin olunan nafakasını aldığı Ahz u kabz. Mahmiye-i İstanbul’da Kabasakal Mahallesi sâkinelerinden olup zâtı es-Seyyid Osman Çelebi b. es-Seyyid Osman ve Osman Çelebi b. Bektaş nâm kimesneler ta‘rîfleriyle mu‘arrefe olan Râbia bt. Fazlı nâm hatun meclis-i şer‘-i hatîr-i lâzımü’t-tevkīrde zevc-i dâhili bâ‘isü hâzihi’l-vesîka Mekkî es-Seyyid Hasan Efendi b. es-Seyyid Murad mahzarında ikrâr ve takrîr-i kelâm edip mezbûr Seyyid Hasan Efendi târih-i kitâb günü bâyinen beni tatlîk etmekle zimmetinde mütekarrir ve ma‘kūdun-aleyh olan bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem ve meûnet-i süknâm için bi’t-terâzî ta‘yîn olunan altı yüz akçe ki cem‘an bin sekiz yüz akçeyi işbu meclis-i şer‘de bana def‘ ve teslîm ben dahi yedinden tamamen ahz u kabz edip hukūk-ı zevciyyete ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâ ve kâffe-i mütâlebât ve muhâsamâtdan her birimiz âharın zimmetini ibrâ-i râfi‘u’l-hısâm ile ibrâ ve iskāt edip min-ba‘d birbirimiz ile vechen mine’l-vücûh ve sebeben mine’l-esbâb kat‘â da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 24 Cumâdelâhire sene [1]143. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Du‘âcı İbrahim b. Mustafa.