Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 272 Hüküm no: 259 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Mehmed’in boşandığı kocası İsmail Beşe b. Abidin ile olan mehir davasında sulh oldukları Sulh. Mahmiye-i İstanbul’da Davudpaşa Mahallesi’nde sâkine olup zâtı Mehmed b. Hasan ve Ahmed b. Şa‘ban ta‘rîfleriyle mu‘arrefe olan İsmihan bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i sâbıkı işbu bâ‘isetü’l-vesîka İsmail Beşe b. Abidin mahzarında ikrâr ve takrîr-i kelâm edip mezbûr İsmail Beşe zevcim olup târih-i vesîkadan on üç gün mukaddem bâyinen beni tatlîk etmekle zimmetinde mütekarrir ve ma‘kūdun-aleyh iki bin akçe mehr-i müeccelimin beş yüz seksen akçesini bana def‘ ve teslîm ben dahi yedinden ba‘de’l-ahz ve’l-kabz bin dört yüz yirmi akçe ile nafaka-i iddet-i mu‘ayyene ve meûnet-i süknâmı zevcim mezbûrdan taleb ve da‘vâ eylediğimde beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâyı mezkûremden beni mezbûr İsmail Beşe ile altı yüz altmış akçe üzerine sulh ettiklerinde ben dahi sulh-ı mezkûru ba‘de’l-kabûl bedel-i sulh olan meblağ-ı mezkûr altı yüz altmış akçeyi mezbûr İsmail Beşe yedinden tamamen ahz u kabz eylediğimden sonra hukūk-ı zevciyyete ve sâire müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 Cumâdelâhire sene [1]143. Şuhûdü’l-hâl: İbrahim Çelebi b. Mustafa, Mehmed Çelebi b. Ahmed, es-Seyyid Ali b. Mustafa, Mehmed Çelebi b. Abdullah.