Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 272 Hüküm no: 260 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu sancağının Araç kazasına bağlı Çukurpelit köyünden Yakub b. Osman’ın babasını öldürdüğünü iddia ettiği Ahmed b. Receb üzerine açtığı davadan vazgeçtiği Da‘vâsından fâriğ. Vilâyet-i Anadolu’da Kastamonu sancağında Araç kazâsına tâbi‘ Çukurpelit nâm karye ahâlîsinden olup bundan akdem katîlen fevt olan Osman b. Abdullah b. Abdurrahman’ın sulbî oğlu ve hasren vârisi olduğunu iddi‘â eden Ya‘kub nâm kimesne meclis-i şer‘-i şerîf-i enverde işbu bâ‘isü’l-kitâb Ahmed b. Receb nâm kimesne mahzarında ikrâr-ı tâm ve takrîr-i kelâm edip babam mezbûr Osman târih-i kitâbdan yirmi sekiz sene mukaddem sâlifü’z-zikr karye mukābilinde vâki‘ dağdan nehâran râkiben mürûr ve ubûr ederken mezbûr Ahmed babam merkūmu sopa ile darb edip zemîne düşürdükden sonra refîklerinden gāib ani’l-meclis Mustafa nâm kimesne babam mezbûrun iki elini ve Şa‘ban ve Nasuh nâm kimesneler dahi iki ayağını tutup işbu Ahmed siyah kabzalı bıçak ile bi-gayr-ı hakkın amden boğazlamışdır deyü merkūmdan mûceb-i şer‘îsini da‘vâya tasaddî eylediğimde ol dahi cevâbında ben[im] katîl-i mezbûrun sulbî oğlu ve hasren vârisi olduğumu ikrâr lâkin babam mezbûrun ber-vech-i muharrer kātili olduğunu bi’l-külliye inkâr edicek beynimizde nizâ‘-ı küllî cereyân etmişidi hâlâ merkūm Ahmed babam mezbûrun kātili olmayıp âhar kimesne olduğuna âlim olduğum ecilden mezbûr Ahmed’den ber-vech-i muharrer da‘vâmdan fâriğ olup husûs-ı mezkûra müte‘allika âmme-i da‘vâ ve kâffe-i mütâlebâtdan mezbûr Ahmed’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Cumâdelâhire sene [1]143. Şuhûdü’l-hâl: İbrahim b. Mustafa Kādızâde, Abdullah Çelebi b. Mustafa muhzır, Mehmed Çelebi b. Abdullah, Mustafa b. Hasan Urfalı, Ahmed b. Şa‘ban.