Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 273 Hüküm no: 261 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in kocası Mustafa’nın öldüğünü şahitlerle ispat ettiği Mahmiye-i İstanbul’da Sarrac İshak Mahallesi sâkinelerinden bâ‘isetü hâzihi’l-vesîka Ümmügülsüm bt. Mehmed nâm hatundan ber-vech-i âtî istihbâr-ı şer‘î sudûrundan sonra udûl-i Müslimîn’den olup vilâyet-i Rumeli’nde vâki‘ medîne-i Tekfurdağı mahallâtından Yeniçeşme nâm mahalle ahâlîsinden ve mahmiye-i mezbûrede mahalle-i merkūmede müsâfiren sâkin Derviş Ali Çelebi b. Yusuf ve Hüseyin b. Laz Mehmed nâm kimesneler li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Ümmügülsüm Hatun’un zevci Mustafa b. Mehmed b. Abdullah târih-i vesîkadan altı ay mukaddem mârru’z-zikr Tekfurdağı mahallâtından zikrolunan Yeniçeşme Mahallesi’nde sâkin iken hasta olup bi-emri’llâhi te‘âlâ vefât eyledi biz cenâze ve namazına hâzırlar olup mekābir-i Müslimîne defneyledik deyü her bir ihbâr etmeğin hıfzan li’l-makāl mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Abdullah Çelebi b. Mustafa, Du‘âcı İbrahim b. Mustafa.