Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 273 Hüküm no: 262 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hüseyin Ağa b. Zülfikar ile el-Hâc Halil Ağa b. Ali b. Abdullah’ın aralarındaki alacak davasında sulh oldukları Servili Hüseyin Ağa’nın sulhü. Vilâyet-i Rumeli’nde vâki‘ Servi kasabası ahâlîsinden olup mahmiye-i İstanbul’da Küçük Karaman kurbünde Emir Hânı demekle ma‘rûf hânda müsâfiren sâkin el-Hâc Hüseyin Ağa b. Zülfikār nâm kimesne meclis-i şer‘-i hatîr-i lâzımü’t-tevkīrde bâ‘isü hâze’l-kitâb el-Hâc Halil Ağa b. Ali b. Abdullah nâm kimesne tarafından husûs-ı âti’z-zikre vekîl olduğu Hasan Ağa b. Ahmed ve İbrahim Bey b. Ömer nâm kimesneler şehâdetleriyle şer‘an sâbit olan İbrahim Çelebi b. Kasım nâm kimesne mahzarında ikrâr-ı tâm ve takrîr-i kelâm edip bir husûsun temşiyyeti’çün bundan akdem müvekkil-i merkūm el-Hâc Halil Ağa’ya mâlımdan sekiz yüz guruş def‘ ve teslîm ol dahi yedimden ahz u kabz etmekle hâlâ meblağ-ı mezbûr sekiz yüz guruşu müvekkil-i merkūmdan taleb ve da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî muslihûn tavassut edip da‘vâ-yı mezkûremden beni vekîl-i merkūm ile an-ikrâr iki yüz elli guruş üzerine sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz elli guruşu müvekkil-i merkūmun mâlından olmak üzere vekîl-i merkūm yedinden tamamen ahz u kabz edip meblağ-ı mezbûrun mâ‘adâsına ve müvekkil-i merkūm ile târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâ ve kâffe-i mütâlebât ve muhâsamâtdan ben müvekkil-i merkūm el-Hâc Halil Ağa’yı ibrâ-i âm ile ibrâ ve iskāt eylediğimde ol dahi bedel-i sulh-ı mezbûra ve târih-i kitâba gelince kezâlik beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan bi’l-vekâle beni ibrâ ve iskāt eylemeğin min-ba‘d birbirimiz ile kat‘â da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 26 Cumâdelâhire sene [1]143. Şuhûdü’l-hâl: Mehmed Efendi b. Hasan el-mukayyid, Bostanzâde es-Seyyid el-Hâc Ahmed Efendi, es-Seyyid Feyzullah Efendi b. Abdülkerim, el-Hâc Mehmed Ziştovili, [57a] Şehzâde Sultan İmâmı es-Seyyid Mehmed Efendi, Mustafa Çelebi Ziştovili, el-Hâc Hüseyin b. Abdullah.