Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 274 Hüküm no: 263 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî İsmail b. Abdullah’ın hizmetine karşılık parasını aldığı Mahmiye-i İstanbul’da Çakırağa Mahallesi’nde sâkin İsmail b. Abdullah nâm mühtedî meclis-i şer‘-i hatîr-i lâzımü’t-tevkīrde hattât tâifesinden işbu hâfızü’l-vesîka Aslan v. Avanis nâm zimmî muvâcehesinde ikrâr-ı tâm ve takrîr-i kelâm edip bundan akdem merkūm Aslan’a on guruş ücret kavliyle bir sene hizmet etmişidim el-hâletü hâzihî merkūm Aslan meblağ-ı mezbûr on guruşu bana def‘ ve teslîm ettiğinde ben dahi yedinden tamamen ahz u kabz edip husûs-ı mezbûra ve târih-i kitâba gelince beynimizde cereyân eden ahz u i‘tâya müte‘allika âmme-i de‘âvî ve kâffe-i mütâlebâtdan merkūm Aslan zimmînin zimmetini ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Cumâdelâhire sene [1]143. Şuhûdü’l-hâl: İbrahim Odabaşı b. Abdullah, Abdullah Odabaşı, Kādızâde İbrahim b. Mustafa, Ya‘kub b. Abdullah, Salih Çelebi b. Mehmed, Mehmed b. Ali.