Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 275 Hüküm no: 264 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühanî bt. Abdullah’ın İsmail Beşe’de olan alacağının bir kısmını tahsil ettiği Mahmiye-i İstanbul’da Kabasakal Mahallesi kurbünde es-Seyyid Hasan Mahallesi sâkinelerinden olup zâtı el-Hâc Hasan b. Mehmed ve el-Hâc Mustafa b. Ahmed nâm kimesneler ta‘rîfleriyle mu‘arrefe olan Ümmühani bt. Abdullah nân hatun meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Mehter İsmail Beşe b. Ali nâm kimesne mahzarında ikrâr-ı tâm ve takrîr-i kelâm edip işbu bin yüz kırk üç senesi Saferi’l-hayrı’nın beşinci günü târihiyle müverraha yedimde olan bir kıt‘a i‘lâm nâtıka olduğu üzere cihet-i sulh-ı şer‘îden mezbûr Mehter İsmail Beşe zimmetinde iki yüz guruş hakkım olmağla mezbûr İsmail Beşe meblağ-ı mezbûr iki yüz guruşun altmış guruşunu işbu meclis-i şer‘de bana def‘ ve teslîm ben dahi yedinden tamamen ahz u kabz eylediğimden sonra mâ‘adâsı olan yüz kırk guruşa ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mütâlebât ve muhâsamâtdan ben mezbûr Mehter İsmail Beşe’nin zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde mezbûr Mehter İsmail Beşe dahi husûs-ı mezbûra ve târih-i kitâba gelince kezâlik beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mütâlebât ve muhâsamâtdan benim ile zevcim işbu hâzır bi’l-meclis el-Hâc Ahmed’i ibrâ-i âmm-ı râfi‘u’l-hısâm ile ibrâ ve iskāt eyledi dedikde gıbbe’t-tasdîkı’ş-şer‘î haymegân-ı hâssa mehterleri ocağının kethüdâsı el-Hâc Ahmed Ağa b. Hüseyin ve yine ocağ-ı mezbûrdan ikinci Ahmed Odabaşı b. Mehmed ve es-Seyyid İbrahim Odabaşı b. el-Hâc Ahmed ve Mehter Mustafa Beşe b. İbrahim nâm kimesnelerden her biri meclis-i şer‘de ikrâr ve takrîr-i kelâm edip mezbûr Mehter İsmail Beşe’nin nefsine ve hîn-i talebde huzûr-ı hükkâma ihzârına her birimiz tekeffül eyledik demeğin mâ-hüve’l-vâki‘ bi’t-taleb ketb olundu. Fî 28 min-Cumâdelâhire sene [1]143. Şuhûdü’l-hâl: El-hâc Hasan b. Mehmed, el-Hâc Mustafa b. Ahmed, Süleyman Ağa b. Abdullah, Yusuf b. Abdullah, Süleyman b. Mehmed, Ali b. Abdullah, Osman b. Hüseyin, Hüseyin Odabaşı cebe, es-Seyyid İbrahim Odabaşı, Ahmed Odabaşı, Mehmed Çelebi b. Abdullah, diğer Mehmed Çelebi b. Abdullah, Du‘âcı İbrahim Çelebi, Salih b. Süleyman, Abdullah b. Mustafa, Ahmed b. Hasan.