Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 279 Hüküm no: 270 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Murtaza b. Abdullah’ın boşandığı kocası Derviş Ali b. İsmail’den mehrini ve diğer alacaklarını tamamen aldığı Mahmiye-i İstanbul’da Firuzağa Mahallesi’nde sâkine Ümmügülsüm bt. Murtaza b. Abdullah nâm hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Abdurrahman b. Hüseyin ve Hüseyin Çelebi b. Bayram nâm kimesneler şehâdetleriyle şer‘an sâbit olan babası mezbûr Murtaza meclis-i şer‘-i şerîf-i enverde müvekkile-i mezbûrenin zevc-i dâhili işbu bâ‘isetü’l-vesîka a‘mâ Derviş Ali b. İsmail mahzarında bi’l-vekâle ikrâr ve takrîr-i kelâm edip mezbûr Derviş kızım müvekkile-i mezbûre Ümmügülsüm Hatun’u târih-i kitâb günü bâyinen tatlîk etmekle zimmetinde mütekarrir ve ma‘kûdun-aleyh olan sekiz yüz akçe mehr-i müecceli ve nafaka-i iddet ve meûnet-i süknâsi’çün dahi bi’t-terâzî ta‘yîn olunan üç yüz akçe ki cem‘an bin yüz akçeyi kızım müvekkile-i mezbûreye def‘ ve teslîm ol dahi yedinden tamamen ahz u kabz eyledi min-ba‘d hukūk-ı zevciyyete müte‘allika kat‘â da‘vâ ve nizâ‘ları yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire Fî-gurreti Receb sene [1]143. Şuhûdü’l-hâl: es-Seyyid Süleyman Efendi b. es-Seyyid Hasan imâm-ı mahalle-i mezbûr, es-Seyyid Yahya Çelebi b. es-Seyyid Bayram, Hüseyin b. İbrahim, İsmail Çelebi b. Mehmed, Ahmed Bey b. Mehmed sarrac, Ömer Beşe b. Halil, el-Hâc Mustafa b. Mehmed ve gayruhum.