Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 280 Hüküm no: 271 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Musa’nın Akmişe mukataasına mengene işçiliğini Mustafa Çelebi b. İbrahim, İsmail Çelebi b. Ahmed ve Noros v. Toros’a ferağ ettiği Ser-cerrâhân-ı hâssa umdetü’l-mevâliyyi’l-izâm Süleyman Efendi b. el-merhûm Nuh Efendi hazretlerinin mâlikâneleri olan Akmişe mukāta‘asına mülhak mengene işçiliğine mutasarrıf olan Ali Ağa b. Musa nâm kimesne meclis-i şer‘-i şerîf-i enverde zikrolunan işçi[li]ğe mukaddemâ mutasarrıf olan ashâb-ı hâze’l-kitâb Mustafa Çelebi b. İbrahim ve İsmail Çelebi b. Ahmed ve Noros v. Toros muvâcehelerinde takrîr-i kelâm ve bast-ı merâm edip zikrolunan işçilik husûsunda beynimizde nizâ‘-ı küllî cereyân etmekle vesâtet-i muslihûn ile mârru’z-zikr işçiliği beş yüz elli guruş bedel mukābelesinde mezbûrûn Mustafa Çelebi ve İsmail Çelebi ve Noros’a ale’l-iştirâk ferağ ve kasr-ı yed ve berâtını kendilere def‘ ve teslîm eylediğimde onlar dahi ber-vech-i muharrer ba‘de’l-kabûl semenleri yüz guruşdan dört yüz guruşa mu‘âdil dört pandol sim sa‘at ve hediyesi yüz elli guruşa müsâvî bir Mushaf-ı şerîf cem‘an bedel-i mezkûr beş yüz elli guruşu mezbûrûn yedlerinden ahz u kabz ve istîfâ eylediğimden sonra husûs-ı mezkûra müte‘allika âmme-i de‘âvî ve mütâlebât ve muhâsamâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik min-ba‘d sâlifü’z-zikr mengene umûrunda kat‘â alâka ve medhalim kalmamağın üzerlerine berât ettirsinler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî-28 Cumâdelâhire sene [1]143. Şuhûdü’l-hâl: Ahmed Efendi b. müşârun-ileyh, Süleyman Efendi, İsmail Çelebi b. Mehmed, İsmail Çelebi b. Ali, el-Hâc Ahmed b. Hamza, Ali Beşe b. Mustafa, Ahmed Efendi imâm-ı Akbıyık, Ali Çelebi b. Abdullah, Mehmed b. Hüseyin.