Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 281 Hüküm no: 272 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İdam edilen Dergâh-ı âlî cebecileri serdengeçtilerinden el-Hâc Hüseyin Ağa’nın evinin anne ve babası tarafından satılarak bedelinin Beytülmalci Yusuf Ağa’ya teslim edildiği Cebeciler beytülmâlcisi hüccetidir. Dergâh-ı âlî cebecileri serdengeçdilerinden olup Mahmiye-i İstanbul’da Akşıkpaşa Mahallesi’nde sâkin iken bundan akdem katîlen fevt olan el-Hâc Hüseyin Ağa b. Hasan b. Receb’in verâseti babası mezbûr Hasan ile vâlidesi Âişe bt. Himmet nâm hatuna münhasıra olduğu lede’ş-şer‘ zâhir ve mütehakkık oldukdan sonra mezbûrân Hasan ve zevcesi Âişe Hatun meclis-i şer‘-i hatîr-i lâzımü’t-tevkīrde hâlâ Dergâh-ı âlî cebecileri ocağında beytülmâlcı olan bâ‘isü’l-kitâb Yusuf Ağa b. Mehmed mahzarında her biri bi’l-verâse ikrâr ve takrîr-i kelâm edip oğlumuz maktûl-i mezbûr el-Hâc Hüseyin Ağa hâl-i sıhhatinde mahmiye-i mezbûrede Davudpaşa Mahallesi’nde vâki‘ ma‘lûmü’l-hudûd büyût-ı adîdeyi müştemil bir kıt‘a mülk menzili bizim için mâlı ile iştirâ ve kabz ettikden sonra oğlumuz mezbûr el-Hâc Hüseyin Ağa bâ-fermân-ı âlî katl ve emvâli mîrî için mütâlebe olunmağla biz dahi menzil-i mezbûru bin iki yüz guruş semen-i makbûza âhara bey‘ ve teslîm ve semenini ba‘de’l-ahz mîrî için hâlâ ocağ-ı mezbûr beytülmâlcisi mezbûr Yusuf Ağa, hâlâ cebecibaşı iftihârü’l-emâcid ve’l-erkân izzetlü Abdullah Ağa’ya teslîm etmek üzere yedine def‘ ve teslîm eylediğimizde ol dahi meblağ-ı mezkûr bin iki yüz guruşu ağa-yı müşârun-ileyh tarafına teslîm etmek üzere yedimizden ahz u kabz edip meblağ-ı mezkûra müte‘allika âmme-i da‘vâdan mezbûr Yusuf Ağa’nın zimmetini ibrâ-i âm ile ibrâ ve iskāt eyledik gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cumâdelâhire sene [1]143. Şuhûdü’l-hâl: Kollukçu Ahmed Beşe b. Hüseyin, Kollukçu Ali Beşe b. Süleyman, Osman b. İbrahim, İsmail Ağa b. Abdullah, Ahmed Ağa b. Hüseyin, Salih Beşe b. Süleyman ve gayruhum.