Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 522 Hüküm no: 1022 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beykoz tokatçılarının tekâlîf-i örfiyyeden muâf oldukları Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ Üsküdar kadısı -dâmet fezâiluhû- tevkî‘-i refî‘-i hümâyûn vâsıl olıcak ma‘lûm ola ki hâliyâ taht-ı kazânıza tâbi‘ Beykoz’da olan tokatçılar rikāb-ı hümâyûnuma ruk‘â sunup biz tekâlîf-i örfiyyeden mu‘âfiyetle tokatçılar olup hizmet-i lâzımemiz edâ edip kusûrumuz yoğiken şimdi olagelmişe muhâlif tekâlîf-i örfiyye teklîf olunur hem tokatçılık ve hem tekâlîf-i örfiyye vermeye kudretimiz yokdur deyu min-ba‘d mu‘tâd-ı kadîme muhâlif tekâlîf-i örfiyye teklîf olunmamak bâbında emr-i şerîf ricâ ederiz deyu bildirmeğin üslûb-ı sâbık üzre amel oluna deyu hatt-ı hümâyûn-ı sa‘âdet-makrûnumla fermân-ı şerîfim olmuşdur buyurdum ki hükm-i şerîfim vardıkda bu bâbda sâdır olan fermân-ı hümâyûnum mûcebince amel edip göresiz fi’l-hakīka zikr olunan tokatçılar vech-i meşrûh üzre olan hizmet-i lâzımeleri mukābelesinde tekâlîf-i örfiyyeden mu‘âf olagelmişler iken hâlâ olagelmişe muhâlif tekâlîf-i mezbûre için rencîde olundukları vâki‘ ise men‘ ve def‘ edip üslûb-ı sâbıka muhâlif mezkûrları kimesne rencîde ve remîde ettirmeyip husûs-ı mezbûr için tekrâr kapıma şikāyete gelmeli ettirmeyesiz ve ba‘de’n-nazar bu hükm-i şerîfimi mezkûrların yedlerinde ibkā edip alâmet-i şerîfime i‘timâd kılasız. Tahrîren fi’l-yevmi’s-sâdis aşer şehri Cemâziyelevvel sene elf. Be-makām-ı Kostantıniyye