Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 528 Hüküm no: 1032 Orijinal metin no: [98a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Mehmed Hân Vakfı’na ait Darıca’ya gelen yava keferelerinin vakfın kız ve cariyeleri ile evlendiği, bunlardan doğan erkek çocukların harâc ve ispençelerinin vakfa ait olduğu, yava âmillerinin bu vergilere karışmalarının engellenmesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ Üsküdar kadısı -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki Bursa’da âsûde olan merhûm ve magfûrun-leh Sultân Mehmed Hân -tâbe serâhu- evkāfı mütevellîsi Murad hâlâ Der-i sa‘âdetime arz gönderip imâret-i âmireleri evkāfından Üsküdar kazâsına tâbi‘ karye-i Darıca ahâlîsinden ba‘zı yava kefere gelip tavattun edip vakfın câriye ve kızlarını tezevvüc etmekle hâsıl olan oğulları yavadır deyu âmiller ispençe ve harâcların taleb edip muhâlefet ederler el-veledü yetbe‘u’l-üm muktezâsınca vakfın kulları olup harâc ve ispençeleri edâsını i‘lâm eylemeğin buyurdum ki hükm-i şerîfim vardıkda husûs-ı mezbûru mukayyed olup ve husemâyı şer‘-i şerîfe berâber edip şer‘le göresin fi’l-vâki‘ ba‘zı yava kefere hâricden gelip vakfın toprağında tavattun edip vakfın câriye kızların tezevvüc edip ve hâsıl olan oğulları şer‘-i şerîf muktezâsınca anaya tâbi‘ olup ve kadîmü’l-eyyâmdan şer‘-i şerîf mûcebince harâc ve ispençeleri vakıf için zabt olunu gelmiş iken hâlâ yava âmilleri hilâf-ı şer‘-i şerîf vakfın câriye kızları oğullarının harâc ve ispençesine dahl edip vakfa gadr eylemek istedikleri vâki‘ ise men‘ ve def‘ edip şer‘a ve kānûna muhâlefet ve kadîmden olagelmişe muğâyir hâricden kimesneye dahl u ta‘arruz ettirmeyip mâl-ı vakfa gadr ve zarar gelmekten be-gāyet hazer edip hakk-ı sarîha tâbi‘ olasın şöyle bilesin alâmet-i şerîfime i‘timâd kılasın. Tahrîren fi’l-yevmi’s-sâmin ve’l-ışrîn şehri Receb min şuhûr sene elf. Be-makām-ı Kostantıniyye