Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 529 Hüküm no: 1033 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki sahte ve eksik ayarlı paraların darbhâneye getirip yenileriyle, değiştirmeyenlerin cezalandırılacakları Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn huccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-mu‘în mevlânâ el-hâkim bi mahrûseti İstanbul -dâmet fezâiluhû- tevkî‘-i refî‘-i hümâyûn vâsıl olıcak ma‘lûm ola ki hâlâ şehirde beyne’n-nâs kem ayar ve nâkısü’l-vezn akçe cevelân eyleyip kalp ve muşakkat akçe cârî olmağla yine sikke-i hümâyûnuma halel ve zarar müterettib olmak üzre yapılmış imdi üç güne değin esvâkda ve mahallâtda nidâ ve tenbîh ettiresin ki herkes bi’l-fi‘l ellerinde olan akçelerini darbhâneye alıp girip sahîhu’l-ayâr ve tâmmü’l-vezn akçe kat‘ ettireler şöyle kim üç günden sonra kalp akçe bulunanlarınız kebîr eğer ve za‘îf ve eğer şerîf ve kavî ve zaîf her kim ise ellerinde bulunan akçeleri girift olundukdan sonra kendileri siyâset olunalar deyu emr edip buyurdum ki hükm-i şerîfimle Dergâh-ı mu‘allâm çavuşlarından kıdvetü’l-emâsil ve’l-akrân Zülfikar Çavuş -zide kadruhû- vardıkda bir an ve bir sa‘at te’hîr ve terâhî eylemeyip vech-i meşrûh üzre câbecâ esvâkda ve bezzâzistanda ve mahallâtda nidâ ve tenbîh ettirip sen ki kat‘â kem ayar ve nâkısü’l-vezn akçe harcatmayalar şöyle ki min-ba‘d vech-i merkūm üzre emrimin hilâfı zâhir ola ol makūleler ele girdikde bulunan akçelerin girift eyleyip ve dahi kendileri mukayyed ve mahbûs Dîvân-ı Hümâyûnuma gönderesin ki bilâ te’hîr siyâset olunup bu makūlelerin sâire mûcib-i ibret ola şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâbi‘ [min] şehri Şa‘bâni’l-mu‘azzam sene elf. Be-makām-ı Kostantıniyye