Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 529 Hüküm no: 1034 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anadolu’daki bazı vergilerin mukâtaasının İbrahim’e iltizâma verildiği, yarar kefiller belirlenip isimlerinin sicile kayd ettirildiği Mefâhirü’l-kuzât ve’l-hükkâm me‘âdinü’l-fezâyil ve’l-kelâm mevlânâ-yı vilâyet-i Anadolu’da vâki‘ kadılar -zîde fazluhüm- tevkî‘-i refî‘-i hümâyûn vâsıl olıcak ma‘lûm ola ki bundan akdem cizye-i yava-i gebrân ve âzâdegān ve kıbtiyân hâric ez defter ve yava mukāta‘ası sene semân ve tis‘în ve tis‘a-mi’e Zilka‘desi’nin yirmisinden üç yıla yedi yüz yirmi bin akçeye iltizâm eyleyen İbrahim, İstanbul kadısı mahzarında sekiz nefer kimesneler ki yüz elli bin akçeye kefîller verdiği defter getirip lâkin İstanbul’da verilen küfelâ çendân makbûl olmayıp tekrâr küfelâ taleb olundukda Bozöyük kadısı mahzarında yarâr kefîller verip verilen küfelânın bir sûreti sicill-i mahfûza kayd eyleyip ve sûretin aslını imzâlayıp ve mühürleyip der-i sa‘âdetime gönderip ba‘demâ mukāta‘aya mübâşeret ettiresin sene-i elf Rebî‘ülevveli’nin on üçüncü günü târihiyle müverrah yedine berât-ı şerîf ve ahkām-ı hümâyûn verilip gitmişdi deyu ve hâlen Dîvân-ı âlîye gelip Bozöyük kadısı Mevlânâ Muhyiddin imzâsıyla elli dokuz nefer kimesneyi iki yüz bin akçeye yarâr kefîller verdiğine mümzâ ve memhûr kefîlnâme ve arz getirip zabtı için hükm-i şerîfim taleb eylemeğin buyurdum ki hükm-i şerîfim vardıkda siz ki toprak kadılarısız bir an ve bir sa‘at te’hîr ve tevakkuf etmeyip her biriniz taht-ı kazâsında bulunan yava kefere ve eğer kıbtiyândır mâ-tekaddemden emînân-ı sâbık ne tarîk ile haklayı gelmiş ise mezkûru dahi elinde olan berât mûcebince zabt ve tasarruf ettirip mâlımın tahsîli bâbında gereği gibi mu‘âvenet ve müzâheret eyleyip eğer re‘âyâ ve eğer yava kefere ve kıbtiyândır kānûn-ı kadîm mûcebince her birinden vâki‘ olan hukūk ve rüsûmların bî-kusûr ve lâ-küsûr cem‘ ve tahsîl ettirip mâlımdan kimesne zimmetinde bir akçe ve bir habbe bâkī kodurmayasız ve ne mikdâr akçe irsâl olunduğun yazıp bildiresiz ve bu husûs için tekrâr emr-i şerîfim göndermeli eylemeyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’t-tâsi‘ aşer [min] şehri Şa‘bâni’l-mu‘azzam sene elf. Be-makām-ı Kostantıniyye