Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 530 Hüküm no: 1035 Orijinal metin no: [98b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ezmerağda bt. Yani’nin bağını bozup ağaç dikecekken ölen Pantazi’nin, bağı İzmiragda’nın izni ile bozduğu Ezmerağda bt. Yani tarafından husûs-ı âtîye nehc-i şer‘î üzre vâki‘ vekâleti sâbite olan mezbûr Yani mahfil-i kazâda Senadinos v. Manol nâm zimmî mahzarında da‘vâ edip mezbûr Senadinos’un mürd olan oğlu Pantazi müvekkilemin zevci iken kızıma temlîk eylediğim inde’l-cîrân ma‘lûmü’l-hudûd bağını bozup çubuk dikip bağ dikip bağ edeyim deyip sonradan gars edemeyip mürd oldu vekâleten suâl olunsun dedikde gıbbe’s-suâl mezbûr Senadinos cevâb verip fi’l-vâki‘ zikr olunan bağı mürd-i mezbûr oğlum bozdu ammâ merkūmun müvekkilesi merkūme Ezmerağda’nın icâzeti ile bozuldu deyip mezbûre Ezmerağda dahi meclis-i şer‘a ihzâr olunup suâl olundukda fi’l-vâki‘ benim icâzetim ile bozup yine gars edeyim deyu ikrâr eylediği kayd olundu. Tahrîren fî evâili Rebî‘ilevvel sene ihdâ ve elf. Şuhûdü’l-hâl: Bâli Bey es-sarrâc, Muttalib [b.] Süleyman, Hüseyin b. Sinan, Mehmed b. Abdullah, Hüseyin b. Behrâm ve gayruhüm