Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 284 Hüküm no: 278 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ebûbekir Ağa b. Hüseyin ile Hasancan b. Mehmed’in Selanik gümrüğü mahsulünden dolayı aralarındaki alacak davasında sulh oldukları Hâlâ medîne-i Selanik gümrüğü mukāta‘ası emîni olup mahmiye-i İstanbul’da Sultan Ahmed Hân Câmi‘-i şerîfi kurbünde müsâfiren sâkin es-Seyyid Ebûbekir Ağa b. Hüseyin nâm kimesne meclis-i şer‘-i şerîf-i enverde bundan akdem vefât eden Mehmed b. Abdullah b. Abdurrahman’ın sulbî kebîr oğlu olup kendi nefsinden asîl ve karındaşı Hüseyinhan [Hüseyincan] nâm sagīrin tesviye-i emrine vasiyy-i şer‘îsi bâ‘isü’l-kitâb Hasancan mahzarında ikrâr ve takrîr-i kelâm edip müteveffâ-i mezbûr Mehmed ile hayâtında bin yüz on sekiz senesi Martı ibtidâsından bin yüz otuz üç senesi Martı ibtidâsına gelince mukāta‘a-i mezbûreye iştirâk-i seviyy üzere mutasarrıf olduğumuza binâen hâlâ mezbûr Hasancan babamız müteveffâ-i mezbûrun mukāta‘a-i mezbûre mahsûlâtından hissesine isâbet eden iki bin guruşunu kendi mesârifine sarfla istihlâk edip ol vechile meblağ-ı mezbûr senin zimmetinde bâkī kalmışidi deyü meblağ-ı mezbûru benden bi’l-asâle ve bi’l-vesâye taleb ve da‘vâya tasaddî ettiğinde ben dahi inkâr etmemle mezbûr Hasancan müdde‘âsını isbâtdan izhâr-ı acz edip ben dahi yemîn etmek üzere iken nef‘an li’s-sagīr muslihûn tavassutuyla da‘vâ-yı mezkûresinden mezbûr Hasancan’ı benimle bin yedi yüz guruş üzerine sulh eylediklerinde ben dahi sulh-ı mezkûru ba‘de’l-kabûl medîne-i Selanik’de Kâtib Muslihiddin Mahallesi’nde vâki‘ emlâkimden bir tarafdan Paşa kethüdâsı menzili demekle ma‘rûf menzil ve bir tarafdan el-Hâc Musazâde Mehmed Ağa menzili ve bir tarafdan Sarrac Ahmed Çelebi menzili ve bir tarafdan tarîk-i âm ile mahdûd dâhiliyesinde fevkānî üç oda ve dehlîz ve matbah ve tahtânî iki oda ve mahtab ve bi’r-i mâ ve mâ-i cârî ve zât-ı eşcâr-ı müsmire ve gayr-ı müsmire bahçe ve bir mikdâr havlu ve hâriciyyesinde fevkānî bir oda ve kameriye ve tahtânî bir oda ve ahır ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i kat‘î ile bin yedi yüz guruşa mezbûr Hasancan ve Hüseyincan’a iştirâk-i [60a] seviyy üzere bey‘ ve temlîk ve semen-i mezkûru bedel-i sulh-ı merkūma takās ve mahsûb ve menzil-i mezbûru mahallinde kabz ve tesellüme taslît eylediğimde mezbûr Hasancan dahi ber-vech-i muharrer bi’l-asâle ve bi’l-vesâye iştirâ ve temellük ve mukāssa ve kabûl eyledikden sonra husûs-ı mezkûre ve sâire müte‘allika âmme-i da‘vâdan ben mezbûr Hasancan ile karındaşı Hüseyincan’ın zimmetlerini ibrâ-i âm ile ibrâ ve iskāt eylediğimde ol dahi bi’l-asâle ve bi’l-vesâye benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd li-sene selâse ve erba‘în ve mi’e ve elf. Şuhûdü’l-hâl: es-Seyyid Mahmud Ağa, oğlu Ahmed Ağa, Alaca? mütevellîsi Süleyman Ağa, Sâkīzâde Ahmed Efendi, Mustafa Ağa el-mütevellî, Ömer Efendi, Mehmed Çelebi b. Abdullah.