Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 290 Hüküm no: 281 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ailesini terk eden Ali Ağa b. Abdullah’ın eşi Fâtıma ve çocuğu Selim’e nafaka bağlanması Nafaka husûsu iledir. Tahakkuk-ı özr-i şer‘îye binâen zikri âtî husûsu mahallinde ketb ü tahrîr için savb-ı şer‘î kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Mustafa Paşa-yı Atîk Câmi‘-i şerîfi kurbünde Canbaziye Mahallesi’nde sâkin fahrü’l-muhadderât bâ‘isetü hâzihi’l-vesîka Fâtıma bt. el-merhûm Hazînedâr Mehmed Ağa’nın menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde zâtı mahalle-i mezbûre imâmı İbrahim Efendi b. Halil ve es-Seyyid Abdullah Çelebi b. Mehmed ta‘rîfleriyle mu‘arrefe olan mûmâ-ileyhâ Fâtıma Hanım meclis-i ma‘kūd-ı mezkûrda takrîr-i kelâm ve bast-ı merâm edip hâlâ sadrâzam-ı bedr efham sa‘âdetlü semâhatlü Mehmed Paşa -yesserallâhu fi’d-dâreyn mâ-yetemennâhu ve mâ-yeşâ- hazretleri ağalarından zevcim Ali Ağa b. Abdullah nâm kimesne beni ve firâşından hâsıl ve benden mütevellid oğlum işbu Selim nâm sagīri ve hâdimem Raziye’yi bilâ-nafaka ve lâ-münfik-i şer‘î terk edip diyâr-ı âhara gitmekle ber-minvâl-i muharrer nafakaya ve sâir levâzım-ı zarûriyyelerimiz için kıbel-i şer‘den kadr-i kifâye nesne farz ve takdîr olunması matlûbumdur dedikde mûmâ-ileyhâ Fâtıma Hanım’ı tahlîf-i şer‘î ile tahlîf eylediğini mevlânâ-yı mezbûr mahallinde ketb ü tahrîr ve ma‘an irsâl olunan Molla Ali b. Mahmud ve Osman b. Mehmed ile meclis-i şer‘a gelip ba‘de’l-inhâ gāib-i mezbûr zevi’l-iktidârdan idiği Müslimûn-ı mezkûrûn ihbârlarıyla lede’ş-şer‘i’l-enver müte‘ayyin olmağın mezbûrûnun nafaka ve kisve ve sâir levâzım-ı zarûriyyeleri için târih-i kitâbdan yevmî beş akçe farz ve takdîr olunup meblağ-ı mefrûz-ı mezkûru ber-vech-i muharrer nafaka ve sâir levâzım-ı zarûriyyeleri için harc ve sarfa ve vakt-i zarûretde istidâne[ye] ve lede’z-zafer zevci gāib Ali Ağa’ya rücû‘a mûmâ-ileyhâ Fâtıma Hanım’a kıbel-i şer‘den izin-birle mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: İbrahim Efendi b. Halil el-imâm, Nurullah Çelebi b. Mustafa, es-Seyyid Abdullah Çelebi b. Mehmed, Ahmed Çelebi b. Abdullah, Molla Ali b. Mahmud, Hasan Bey b. Mustafa.