Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 291 Hüküm no: 282 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Demirci Vakfı’na ait evin tasarruf hakkının el-Hâc Abdullah b. Veli’ye satıldığı Mahmiye-i İstanbul’da Sarıdemirci Mahallesi’nde sâkin iken bundan akdem vefât eden Ahmed b. İbrahim b. Osman’ın sulbî kebîr oğlu İsmail Beşe meclis-i şer‘-i şerîfde zikrolunan Sarı Demirci Vakfı’ndan mahalle-i mezbûrede vâki‘ ma‘lûmü’l-hudûd zikri âtî bir bâb menzile mutasarrıf olan bâ‘isü’l-kitâb el-Hâc Abdullah b. Veli mahzarında vakf-ı mezbûra meşrûtiyyet üzere mütevellî olan mahalle-i mezbûre imâmı Osman Efendi b. Ahmed hâzır olduğu hâlde takrîr-i kelâm ve bast-ı merâm edip babam müteveffâ-i mezbûr hayâtında ber-mûceb-i temessük icâreteyn-i ma‘lûmeteyn ile tasarrufunda olan menzil-i mezkûru bin yüz on altı senesi Zilhiccesi’nde bâ-ma‘rifet-i mütevellî İbrahim nâm kimesneye beş yüz guruş bedel-i makbûz mukābelesinde ferağ ve tefvîz ol dahi ba‘de’t-tefevvüz bin yüz otuz bir senesinde vefât etmekle menzil-i mezkûra sulbiye kebîre kızları Hadice ve Zeyneb hatunlara ba‘de’l-intikāl mezbûretân Hadice ve Zeyneb menzil-i mezkûru ber-vech-i muharrer [bin] yüz otuz iki senesi Muharremi gurresinde el-Hâc Hasan Ağa’ya ber-vech-i muharrer ferâgat eylediklerinden sonra mezbûr el-Hâc Hasan Ağa [bin] yüz otuz altı senesinde vefât edip menzil-i mezkûr sulbiye kızı Âişe nâm sagīreye ba‘de’l-intikāl menzil-i mezkûrun [61b] bir mikdârı muhterik ve harâba müşrif olmağla sagīre-i mezbûrenin ta‘mîr ve binâya ve müeccelesini cânib-i vakfa edâya iktidârı olmamağla ber-mûceb-i hüccet vasîsi olan vâlidesi İsmihan Hatun kıbel-i şer‘den me’zûne olduğu hâlde ba‘de’l-müzâyede menzil-i mezkûru ber-vech-i muharrer bâ-ma‘rifet-i mütevellî bedel-i misli ile mezbûr el-Hâc Abdullah ile karındaşı oğlu Nurullah b. Mustafa’ya târih-i mezkûr senesi Şevvâli’nin on üçüncü günü ale’l-iştirâk bi’l-vesâye ba‘de’t-tefvîz mezbûr Nurullah mutasarrıf olduğu nısf hisse-i mezkûresini yine târih-i merkūm senesi Şevvâli’nin yirmi beşinci günü ammi-i mezbûr el-Hâc Abdullah’a bâ-ma‘rifet-i mütevellî ferağ ve tefvîz ol dahi minvâl-ı muharrer tefevvüz ve kabûl etmeğin el-hâletü hâzihî menzile müte‘allika mezbûr el-Hâc Abdullah ile vechen mine’l-vücûh kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a ketb olundu. Fi’l-yevmi’s-sâdis min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Düğmeci Mehmed b. Mustafa, Nurullah Beşe b. Mustafa, Mustafa Efendi b. el-Hâc Mehmed, el-Hâc Mustafa b. Veli, el-Hâc İshak b. Mustafa, Berber İbrahim Çelebi b. Mehmed, Çolak İbrahim Beşe b. Halil, Mustafa Çelebi b. Seyfullah.