Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 292 Hüküm no: 283 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ömer Efendi ile önceden voyvoda olan Ahmed Ağa’nın aralarındaki alacak davasında sulh oldukları Vilâyet-i Anadolu’da Derne kasabası ahâlîsinden es-Seyyid Ömer Efendi b. es-Seyyid Osman ( ) oğlu ve tarafından husûs-ı âti’z-zikre vekîl olduğu ber-nehc-i şer‘î sâbit olan es-Seyyid Osman nâm kimesne meclis-i şer‘-i şerîf-i enverde bâ‘isü hâze’l-kitâb Ahmed Ağa b. Mehmed mahzarında bi’l-vekâle takrîr-i kelâm ve bast-ı merâm edip bundan akdem mezbûr Ahmed Ağa kasaba-i mezkûrede voyvoda olduğu hâlde babam müvekkil-i mezbûrun bi-gayr-ı hakkın dört yüz elli guruşunu ahz u kabz etmekle meblağ-ı mezbûru mezbûr Ahmed Ağa’dan ber-vech-i muharrer taleb ve da‘vâ eylediğimde ol dahi ba‘de’l-ikrâr beynimize muslihûn tavassut edip da‘vâ-yı mezkûremden beni mezbûr Ahmed Ağa ile yüz otuz guruşa sulh eylediklerinde ben dahi sulh-ı mezkûru ba‘de’l-kabûl bedel-i sulh-ı mezkûr yüz otuz guruşu yedinden bi’l-vekâle ahz u kabz eylediğimden sonra mâ‘adâ üç yüz yirmi guruşa müte‘allika âmme-i da‘vâ ve mütâlebât ve muhâsamâtdan mezbûr Ahmed Ağa’yı bi’l-vekâle ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Salih Ağa b. Süleyman, Ya‘kub b. Abdullah, Abdullah b. Mustafa, Mehmed Efendi b. Ahmed, es-Seyyid Ömer Çelebi b. es-Seyyid Ahmed, Ali b. Mustafa, Ebûbekir b. Mustafa, Mısrî Ahmed Ağa b. ( ), Mehmed Çelebi b. Ahmed, İbrahim Beşe b. Mustafa, Hasan Ağa b. Mehmed.