Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 292 Hüküm no: 284 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Has odabaşı el-Hâc Halil Ağa’nın evini Ahmed Çelebi b. el-Hâc Ali’ye sattığı Mübâya‘a hüccetidir Akbıyık Mahallesi’nden. Mahmiye-i İstanbul’da Ahırkapı kurbünde Akbıyık Mahallesi ahâlîsinden ve hâlâ Saray-ı âmire’de hâs odabaşı olan umdetü’l-havâs ve’l-mukarrebîn izzetlü el-Hâc Halil Ağa b. Ahmed b. Abdurrahman b. Abdürrezzak taraf-ı bâhir-i şerîflerinden bey‘-i âti’z-zikre vekîl olduğu Hüseyin Efendi b. el-Hâc Ahmed ve el-Hâc Mustafa Ağa b. Ramazan nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan umdetü’l-müderrisîni’l-kirâm Abdullah Efendi b. Mehmed Ağa meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ahmed Çelebi b. el-Hâc Ali nâm kimesne mahzarında bi’l-vekâle ikrâr-ı tâm ve takrîr-i kelâm edip mahalle-i mezbûrede vâki‘ iki tarafdan müvekkilem müşârun-ileyh menzili ve bir tarafdan Mumcu İsmail Bey menzili ve bir tarafdan tarîk-i hâs ile mahdûd mecmû‘u iki yüz yirmi zirâ‘ arsa üzerinde mebnî ve mevcûde ulyâda iki bâb oda ve bir sofa ve vustâda bir bâb oda ve dehlîz ve süflâda bir matbah ve kenîf ve bi’r-i mâ ve etrâf-ı erba‘adan taş duvarı müştemil menzilin ebniye-i mezkûresini akd-i âti’z-zikrin sudûruna değin müvekkilim müşârun-ileyh el-Hâc Halil Ağa’nın yedinde mülk ve hakkı ve arsa-yı mezkûresi sulehâya meşrûta olmağla tevcîh-i hâkimü’ş-şer‘le tasarrufunda olmağın müvekkilim müşârun-ileyh el-Hâc Halil Ağa ebniye-i mezkûreyi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Ahmed Çelebi’ye dört yüz kırk guruşa bey‘ ve temlîk ve teslîm ve arsasından kasr-ı yed etmekle ol dahi ber-vech-i muharrer iştirâ ve temellük ve kabz ve kabûl eyledikden sonra semeni olan meblağ-ı mezbûr dört yüz kırk guruşu müvekkilem-i müşârun-ileyh merkūm Ahmed Çelebi yedinden tamamen ahz u kabz eyledi fîmâ-ba‘d ebniye-i mezkûre merkūm Ahmed Çelebi’nin mülk-i müşterâsı ve hakk-ı sırfı olup müvekkilim müşârun-ileyhin kat‘â alâka ve medhali kalmamışdır dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- hazretleri dahi arsa-yı mevkūfe-i mezbûreyi ber-mûceb-i şart-ı vâkıf merkūm Ahmed Çelebi sulehâdan olmağla kendiye tevcîh buyurup tasarrufuna izin vermeğin mâ-hüve’l-vâki‘ bi’t-taleb ketb olundu. Hurrire fî-gurreti Recebi’l-ferd sene [1]143. Şuhûdü’l-hâl: El-hâc Ahmed b. el-Hâc Mehmed, el-Hâc İsmail b. Mehmed, Hasan Ağa b. el-Hâc Ali, es-Seyyid Feyzullah Efendi b. Abdülkerim Efendi kâtib-i Bâb, Ahmed Efendi b. Mehmed el-imâm, el-Hâc Mahmud b. Receb el-müezzin, el-Hâc Abdullah Efendi b. Salih.