Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 293 Hüküm no: 285 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Şâme bt. Mehmed b. Ahmed’in kardeşi ve vârisi Gül ile Fâtıma bt. Ali’nin aralarındaki davada sulh oldukları Topkapısı’nda sulh ibrâ hüccetidir. Mahmiye-i İstanbul’da Topkapısı kurbünde Bayezidağa Mahallesi’nde sâkine iken bundan akdem vefât eden Şâme bt. Mehmed b. Ahmed nâm hatunun verâseti li-ebeveyn karındaşı Gül bt. el-mezbûr Mehmed’e münhasıra olduğu lede’ş-şer‘î zâhir ve müte‘ayyin olan mezbûre Gül nâm hatun meclis-i şer‘-i hatîr-i lâzımü’t-tevkīrde işbu bâ‘isetü’l-vesîka Fâtıma bt. Ali nâm hatun mahzarında bi’l-verâse ikrâr ve takrîr-i kelâm edip müteveffât-ı mezbûre Şâme hâl-i hayâtında târih-i vesîkadan üç sene mukaddem eşyâ-i memlûkesinden kırk iki guruş kıymetli bir sim kuşağı mezbûre Fâtıma’ya def‘ ve teslîm ol dahi ahz u kabz etmekle zikrolunan kuşağın aynı mevcûde ise aynını müstehleke ise ba‘de’s-sübût kıymet-i şer‘iyyesini mezbûre Fâtıma Hatun’dan taleb ve da‘vâ eylediğimde ol dahi cevâbında müteveffât-ı mezbûre Şâme Hatun hayâtında bana hibe ve temlîk etmişidi deyü da‘vâyı def‘ edicek beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûre Fâtıma ile on guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on guruşu mezbûre Fâtıma Hatun yedinden tamamen ahz u kabz eylediğimden sonra husûs-ı mezkûra müte‘allika âmme-i da‘vâdan mezbûre Fâtıma Hatun’ın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi bana medfû‘u olan meblağ-ı mezbûr on guruşa müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fî-8 min-Recebi’l-ferd sene [1]143. Şuhûdü’l-hâl: Mehmed Efendi b. Ahmed Efendi, Molla Mustafa b. Ahmed Efendi, Mahmud Çelebi b. Mustafa, Musa Beşe b. Ali, el-Hâc Mustafa b. İbrahim, Molla Sunullah b. Mustafa Dede, Kādızâde İbrahim Çelebi b. Mustafa, Mehmed Beşe b. Ali.