Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 294 Hüküm no: 286 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evlatlık verilen Vartagon’a nafaka bağlanması Vilâyet-i Anadolu’da vâki‘ medîne-i İznikmid’de Kilise Mahallesi mütemekkinlerinden olup Mahmiye-i İstanbul’da Kumkapı kurbünde müsâfiren mütemekkin Miregos v. Agop nâm zimmî meclis-i şer‘-i hatîr-i lâzımü’t-tevkīrde bâ‘isü hâze’s-sifr Şekri v. Toman nâm zimmî muvâcehesinde takrîr-i kelâm ve bast ani’l-merâm edip işbu sulbî oğlum Vartagon nâm sagīri bundan akdem mesfûr Şekri’ye bi-tarîkı’t-terebbî ve’t-tebennî def‘ ve teslîm ol dahi ber-vech-i muharrer yedimden ahz eylemişidi lâkin oğlum mesfûrun mâlı olmayıp nafakaya ihtiyâcı olmağla oğlum sagīr-i mezbûrun nafaka ve kisve ve sâir levâzım-ı zarûriyyesi’çün bana bi-şartü’r-rücû‘ târih-i kitâbdan beher yevm dörder para harc ve sarf etmek üzere mesfûr Şekri’ye emreylediğimde ol dahi ber-vech-i muharrer oğlum sagīr-i mezbûru terbiye ve infâka ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-mürecceb sene [1]143. Şuhûdü’l-hâl: Mehmed Çelebi b. Abdullah, Du‘âcı İbrahim b. Mustafa, Salih Çelebi b. Süleyman, Ahmed Çelebi b. el-Hâc Hasan, Abdullah Çelebi b. Mustafa, Kirkor v. Hırbet, Hüdaverdi v. Zafir, Bogos v. Ağazar, Aci Oseb v. Avendik?, Hogaç b. Kostantin, Papa Aritun v. Haçador.