Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 294 Hüküm no: 287 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden cebecilerden Laz Mehmed Beşe’nin terekesi için eşi Sâliha tarıfından Mehmed Halîfe’nin vekil tayin edildiği Mahmiye-i İstanbul’da Kürkçübaşı Mahallesi ahâlîsinden ve Dergâh-ı âlî -dâme mahfûfen bi’l-me‘âlî- cebecilerinin beşinci bölüğe mahsûs oda neferâtından olup vilâyet-i Anadolu’da vâki‘ medîne-i Trabzon’da müsâfireten sâkin iken bundan akdem vefât eden Laz Mehmed Beşe b. Abdullah b. Abdurrahman’ın vasîsi mahalle-i mezbûrede sâkine zevce-i menkûha-i metrûkesi Sâliha bt. Mustafa ile sulbî oğlu Ali nâm sagīre münhasıra ve tashîh-i mes’elesi sekiz sehmden olup sihâm-ı mezbûreden bir sehmi zevce-i mezbûre Sâliha’ya ve bâkī yedi sehmi sagīr-i mezbûr Ali’ye isâbet ve intikāl etmekle sagīr-i mezbûrun vâlidesi ve tesviye-i umûruna kıbel-i şer‘den mansûbe vasîsi olan mezbûre Sâliha Hatun meclis-i şer‘-i hatîr-i lâzımü’t-tevkīrde Dergâh-ı âlî cebecileri halîfelerinden bâ‘isetü hâzihi’l-vesîka Mehmed Halîfe b. Mustafa nâm kimesne mahzarında bi’l-asâle ve bi’l-vesâye ikrâr-ı tâm ve takrîr-i kelâm edip bundan akdem zevcim müteveffâ-i mezbûr medîne-i mezbûrede vefât ettikde vârisi olmamak zu‘mu ile ber-mûceb-i defter-i kassâm tereke-i ma‘lûmesini medîne-i mezbûrede emîn-i beytülmâl zabt etmekle zevcim müteveffâ-i mezbûrun ber-mûceb-i defter tereke-i ma‘lûmesini [62b] emîn-i merkūmdan ve bi’l-cümle tereke-i müteveffâ-i mezbûre vâzı‘u’l-yed olanlardan taleb ve da‘vâ ve ahz u kabza ve bana îsâle ve ahz u kabz mütevakkıf olduğu umûrun küllîsine tarafımdan mûmâ-ileyh Mehmed Halîfe’yi vekîl ve nâib-i menâb nasb ve ta‘yîn eylediğimde ol dahi vekâlet-i mezbûreyi kabûl ve hizmet-i lâzimesini kemâ-yenbagī edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 min-Recebi’l-ferd sene [1]143. Şuhûdü’l-hâl: Mehmed Çelebi b. Mustafa, diğer Mehmed Çelebi b. Abdullah, İbrahim b. Mustafa, Sedefçi Mahmud Beşe ve gayruhum mine’l-huzzâr.