Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 295 Hüküm no: 288 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. İbrahim’in evini Ümmühanî bt. el-Hâc Mustafa’ya sattığı Mahmiye-i İstanbul’da Mahmud Paşa Câmi‘-i şerîfi kurbünde Servi Mahallesi sâkinlerinden Ahmed Ağa b. İbrahim nâm kimesne meclis-i şer‘-i şerîf-i enverde bâ‘isetü hâzihi’l-vesîka Ümmühani bt. el-Hâc Mustafa nâm hatun mahzarında ikrâr ve takrîr-i kelâm edip arsası merhûm Haydar Çavuş Vakfı’na senede doksan akçe mukāta‘a-i kadîme ile tasarrufumda ve ebniyesi akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan el-Hâc Ahmed mülkü ve bir tarafdan Vidin nâzırı Ahmed Ağa mülkü ve bir tarafdan Lütfi Ağa ve Ekmekçi el-Hâc Hasan mülkleri ve bir tarafdan tarîk-i hâs ile mahdûd ve dâhiliyesinde fevkānî üç bâb oda ve bir sofa ve tahtında bir kilâr ve matbah ve kenîf ve hâriciyyesinde fevkānî iki bâb oda ve bir sofa ve dehlîz ve kârgîr mahzen ve ahır ve kenîfi muhtevî menzilin ebniye-i memlûke-i mezkûresini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bin elli guruşa mezbûre Ümmühani Hatun’a bey‘ ve temlîk ve teslîm ve arsa-yı mezkûresini bâ-ma‘rifet-i mütevellî meccânen ferağ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr bin elli guruşu yedinden tamamen ahz u kabz eyledim min-ba‘d ebniye-i mezkûre mezbûre Ümmühani Hatun’un mülk-i müşterâsı ve arsa-yı mezkûre hakk-ı müfevvezi olup kat‘â benim alâka ve medhalim kalmadı. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fî-8 min-Recebi’l-ferd sene [1]143. Şuhûdü’l-hâl: Ahmed Ağa b. Abdi, Yağlıkçı Abdülhalim Çelebi b. Abdullah, Molla Hüseyin b. Abdullah, İvaz Beşe b. Abdullah, İbrahim Ağa b. Abdullah, Esîrci el-Hâc İbrahim b. el-Hâc Mehmed, Mustafa Çelebi b. İbrahim, Mehmed b. Abdullah.