Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 296 Hüküm no: 289 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Viranşehir kazasına tâbi Bayındır ve Hamamlı köyleri menzilcileri ile Bolu sancağı voyvodası Yusuf Ağa ve ortağı Ahmed Bey’in alacak davasında sulh oldukları Vilâyet-i Anadolu’da Bolu sancağında Viranşehir kazâsına tâbi‘ Bayındır nâm karye ahâlîlerinden Hasan Bey b. Sâbit ve diğer Hasan Bey b. Mustafa b. Hasan ve Resul Bey [b.] İsmail ve Ömer b. Mehmed ve Mehmed b. İbrahim ve Osman Bey b. Mehmed ve Mustafa b. İbrahim ve Mustafa b. Satılmış ve Mustafa b. Süleyman ve Ali b. İbrahim ve İsmail b. Mehmed ve Ali Bey b. Satılmış ve Ahmed b. Satılmış ve Mehmed b. Hasan ve Ahmed Ağa b. Halil ve Ali b. Musa ve Mehmed b. Ali ve el-Hâc Abdurrahman b. Murad ve İbrahim b. Mustafa ve Ahmed b. Mustafa ve Mehmed b. Mustafa ve Hamamlı nâm karye ahâlîlerinden Halil b. el-Hâc Ahmed ve Ali b. Osman ve Ahmed b. Ahmed ve Hüseyin b. Mehmed ve İbrahim b. Hüseyin ve Mehmed b. İsa ve İbrahim b. Üveys ve Süleyman b. Resul ve Mustafa b. Resul ve Mustafa b. ( ) ve İbrahim b. Zülfikār ve Süleyman b. Receb ve Osman b. Receb ve Hasan b. İbrahim ve İsa b. İvaz ve Mehmed b. Eyüb ve el-Hâc Ali b. Veli ve Mehmed Çavuş b. Halil ve Hüseyin b. Musa ve İbrahim b. Ahmed ve Ahmed b. Mustafa ve Mustafa b. Hasan ve Ali b. Hüseyin ve Kara Hüseyin b. Ali ve Mehmed b. Hasan nâm kimesneler meclis-i şer‘-i şerîf-i hatîr-i lâzımü’t-teşrîfde sancak-ı mezkûr voyvodası Yusuf Ağa b. Ahmed b. İbrahim ve şerîki Ahmed Bey b. İbrahim Paşa b. Abdurrahman taraflarından husûs-ı âti’z-zikre vekîl olduğu Mehmed Beşe b. Mustafa ve Osman Beşe b. İbrahim nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan işbu bâ‘isü’l-kitâb Ahmed Ağa b. Mehmed muvâcehesinde her biri takrîr-i kelâm ve tâ‘bir ani’l-merâm edip işbu yedimizde olan derkenâr mûcebince bizler mârru’z-zikr Bayındır menzilcisi olup evâmir-i aliyye ile vârid olan ulaklara bir türlü muzâyaka göstermemek üzere kazâ-i mezbûrun otuz beş avârız ve nüzûl hâneleri [63a] mâllarından beher sene dört yüz bir guruş takās ve bizler dahi mukāssa bizler taraf-ı Devlet-i aliyye’ye gelip bizlere ta‘yîn olunan otuz beş avârız hânesinden mâ‘adâ kazâ-i mezbûrun mecmû‘ avârız hânesini menzil-i mezkûra ocaklık ta‘yîn ve cümlesi ale’l-ittifâk menzil-i mezkûra i‘ânet etmek üzere emr-i âlî ricâ eylediğimizde kazâ-i mezbûrun mukaddemâ menzi[l]-i mezbûra ocaklık ta‘yîn olunan mârru’z-zikr otuz beş hânesinden mâ‘adâ altmış dere [dört] buçuk hâneleri dahi menzil-i mezbûra ocaklık ta‘yîn ve fîmâ-ba‘d kazâ-i mezbûr ahâlîleri ale’l-ittifâk menzil-i mezkûrun umûrunu görmek üzere fermân-ı âlî ihsân ve mahalline kaydolunmuş iken voyvodamız olan mezbûrân Yusuf Ağa ve Ahmed Bey on yedi seneden berü mârru’z-zikr otuz beş hâne avârız mâlının mecmû‘unu kabz ve bizlere ancak bin beş yüz guruş verip bâkīsi zimmetlerinde müctemi‘ olduğundan mâ‘adâ bi-gayr-ı hakkın zulmen mâllarımızı dahi ahz u kabz etmeleriyle cem‘an zimmetlerinde olan yirmi bir bin guruşu mezbûrândan taleb ve da‘vâ eylediğimizde onlar dahi inkâr bizler isbât sadedinde iken beynimize muslihûn tavassut edip da‘vâ-yı mezkûremizden bizleri dört bin guruş üzerine inşâ-i akd-i sulh eylediklerinde mezbûrân Yusuf Ağa ve Ahmed Bey kazâmız olan mârru’z-zikr Viranşehir kazâsından bizlere imdâd için merhameten zam ve ilhâk ve ocaklık ta‘yîn ve fîmâ-ba‘d kazâ-i mezbûr ahâlîleri ale’s-seviyye ve ale’l-ittifâk menzil-i mezbûrun umûrunu görmek üzere fermân-ı âlî ihsân buyrulan altmış dört buçuk hâneyi beher sene bizlere tahsîl için ta‘ahhüd etmeleriyle bizler dahi sulh-ı mezkûru kabûl ve bedel-i sulh olan meblağ-ı mezbûr dört bin guruşu yedlerinden bi’t-tamam ve’l-kemâl ahz u kabz eylediğimizden sonra mârru’z-zikr avârız hânesi mâlından müctemi‘ ve zulmen aldıkları emvâl-i ma‘lûmeye müte‘allika âmme-i da‘vâdan mezbûrân Yusuf Ağa ve Ahmed Bey’in zimmetlerini ibrâ ve iskāt eylediğimizde onlar dahi vech-i meşrûh üzere sâlifü’z-zikr Viranşehir kazâsının bizler için imdâda memûr oldukları altmış dört buçuk hâne-i avârızı beher sene bizlere edâ ettirmek üzere ta‘ahhüd ve bedel-i sulh-ı mezkûr dört bin guruşa müte‘allika âmme-i da‘vâdan bizim zimmetlerimizi ibrâ ve iskāt eylemeleriyle ba‘de’l-yevm husûs-ı mezbûra müte‘allika tarafeynden temessük ve sâir senedât zuhûr ederse amel olunmasın dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fî-7 min-Recebi’l-ferd sene [1]143. Şuhûdü’l-hâl: El-hâc Mehmed b. Ali, Karlı? b. Nuri Fakih, el-Hâc Mustafa b. Ahmed, Hüseyin b. Ali, Şahabeddin kazâsı ahâlîsinden Mustafa b. İbrahim, Mustafa b. Abdullah.