Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 297 Hüküm no: 290 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusçuk kasabasından Karabacak Mehmed Ağa’nın kimseye zulmetmeyeceğini taahhüt ettiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i şerîf-i enverden irsâl olunan Mevlânâ Müezzinzâde Mehmed Efendi b. İbrahim Efendi Mahmiye-i İstanbul’da Dergâh-ı âlî -dâme mahfûfen bi’l-me‘âlî- yeniçerileri ağası olanlara mahsûs sarayda kethüdâ yeri olan ağalara ta‘yîn olunan odaya varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i kavîm ettikde vilâyet-i Rumeli’nde medîne-i Rusçuk ahâlîsinden ve Mahmiye-i mezbûrede müsâfiren sâkinler olup kendi nefislerinden asl ve medîne-i mezbûre sükkânından ma‘lûmü’l-esâmî ve mahsûrü’l-eşhâs sâir ahâlî taraflarından husûs-ı âti’l-beyâna vekîl-i şer‘îleri Ali Efendi b. Hasan ve Na‘lbur el-Hâc Ahmed b. Mehmed ve el-Hâc Mustafa b. Davud ve el-Hâc Mustafa b. ( ) ve el-Hâc Ali Çavuş ve tüccârdan Ahmed Beşe b. Musa ve Molla Mehmed b. Hasan ve Mûytâb Mustafa Beşe b. Osman ve es-Seyyid Halil Ağa b. el-Hâc Mehmed ve Mehmed Beşe b. Ali ve el-Hâc Süleyman b. Ahmed ve İsmail Çelebi b. Süleyman ve el-Hâc Osman b. Mustafa ve Ahmed Çelebi b. Yahya ve es-Seyyid Ahmed b. es-Seyyid Mehmed ve Ahmed Ağa b. Ömer ve İmâm Mustafa Efendi b. Ahmed ve el-Hâc Mustafa b. Musa ve tüccârdan Muslu Çelebi ve el-Hâc Mehmed b. Hasan ve Mütevellî Ahmed b. İsmail ve Mehmed Ağa b. Hasan ve Derviş Efendi b. Hasan ve Ali Beşe b. Mehmed ve Ahmed Beşe b. Yusuf ve Ahmed b. Hasan ve Mehmed Ağa b. el-Hâc Osman nâm kimesneler meclis-i ma‘kūd-ı mezkûrda bâ‘isü hazihi’l-vesîka Karabacak Mehmed Ağa b. Mustafa mahzarında takrîr-i kelâm ve bast-ı merâm edip bundan akdem mezbûr ile beynimizde olan şikāka binâen yedlerimizde olan i‘lâm mantûkunca sû-i hâli ihbâr ve mûcebince fermân-ı âlî sâdır olmuş idi el-hâletü hâzihî beynimiz tevfîk olmağla mezbûr Mehmed Ağa fîmâ-ba‘d murâdımız üzere kat‘â umûrumuza müdâhale etmeyip nâib ve kādı ve sâir ehl-i örfe gammaz zulüm ve te‘addî ve gadr ve rencîde etmemek üzere ba‘de’t-ta‘ahhüd eğer kendiden mazmûn-ı kitâba muhâlif bir fi‘il sudûru şer‘an zâhir olursa mâlından taraf-ı mîrîye iki bin beş yüz guruş nezir eyledi dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s irsâl olunan [63b] Çukadâr İsmail b. Hasan ve Muhzır Salih b. Süleyman ile meclis-i şer‘a inhâ ve takrîr etmeğin mâ-vaka‘a bi’t-taleb ketb olundu. Fî 7 min-Recebi’l-ferd sene [1]143. Şuhûdü’l-hâl: es-Seyyid Mehmed b. el-Hâc Mehmed, el-Hâc Süleyman b. Mehmed, Mustafa b. İbrahim, Mustafa b. Mehmed, Mehmed Ağa b. Ali Kethüdâ, Mehmed Efendi b. İvaz, Dîvân efendisi Ali Efendi, Mehmed Efendi yazıcı-i ----, el-Hâc Ömer Ağa b. Ahmed.