Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 298 Hüküm no: 291 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime Hatun’un Uzun Şüca‘ Vakfı’na ait arsa üzerindeki evini Mustafa Ağa’ya sattığı Mahmiye-i İstanbul’da Peykhâne kurbünde Uzun Şücâ‘ Mahallesi’nde sâkine Kerime Hatun bt. Mustafa b. Abdullah tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre imâmı Yusuf Efendi b. İbrahim ve el-Hâc Abdullah b. Abdullah nâm kimesneler şehâdetleriyle sâbit olan Süleyman Çelebi b. Ali nâm kimesne meclis-i şer‘-i şerîf-i enverde bâ‘isü hâze’l-kitâb Mustafa Ağa b. Mehmed mahzarında ikrâr ve takrîr-i kelâm edip arsası senede yüz yirmi akçe ile mârru’z-zikr Uzun Şücâ‘ Mescid-i şerîfi evkāfına mukāta‘a-i kadîme ile müvekkilem mezbûrenin taht-ı tasarrufunda ve üzerinde mevcûde binâsı yedinde mülk ve hakkı olan ma‘lûmü’l-hudûd ve’l-müştemilât menzilden müfrez olup üç tarafdan vakf-ı mezbûr ve bir tarafdan mescid-i şerîf duvarı ile mahdûd fevkānî iki bâb oda ve tahtânî bir matbah ve bir mikdâr dehlîz ve kenîf ve havluyu müştemil menzilin ebniye-i mezkûresini mezbûr Mustafa Ağa’ya üç yüz guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferağ ve tefvîz eylediğinde ol dahi ber-minvâl-i muharrer iştirâ ve temellük ve kabz ve kabûl eyledikden sonra semeni olan meblağ-ı mezbûr üç yüz guruşu merkūm Mustafa Ağa yedinden tamamen ahz u kabz eyledi min-ba‘d zikri mürûr eden ebniye-i mezkûre mülk-i müşterâsı ve arsa-yı merkūme dahi havza-i tasarrufu olup müvekkilem mezbûre Kerime Hatun’un kat‘â alâka ve medhali kalmamışdır. Keyfemâ-yeşâ ve yahtâr emsâli gibi mutasarrıf olsun dedi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 11 Recebi’l-ferd sene [1]143. Şuhûdü’l-hâl: es-Seyyid Mehmed Çelebi b. Mustafa, Mehmed Çelebi b. Abdullah bölükbaşı, Ya‘kub b. Abdullah, Yusuf Efendi b. İbrahim imâm-ı mahalle, el-Hâc Abdullah Çelebi b. Abdullah, Abdulkādir Çelebi b. Ca‘fer?, Halil Çelebi b. Salih.