Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 299 Hüküm no: 292 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kettanî Abdülbâki Çelebi’nin vakfı olan evin İbrahim Çelebi’nin çocuklarına tevcih olunduğu Fazîletlü efendi hazretlerinin imzâsıyla kızlarına tevcîh eylediği hüccetdir. Ashâb-ı hayrâtdan merhûm ve mağfûr Kettânî Abdülbâki Çelebi’nin içinde sâkin olanlar külli yevm üçer İhlâs-ı şerîf tilâvet ve sevâbını rûhuna ihdâ etmek üzere vakf ve habs ve şart eylediği mahmiye-i İstanbul’da Mimar Sinan Mahallesi’nde vâki‘ bir tarafı vakf-ı mezbûr odaları ve bir tarafı tarîk-i hâs ve tarafeyni tarîk-i âm ile mahdûd bir bâb menzilinin mutasarrıfı iken fevt olan İbrahim Çelebi b. Muharrem veresesi yedlerinde olan keşif hücceti mantûkunca hâl-i hayâtında menzil-i mezkûru mâlıyla ta‘mîr etmekle hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri mârru’z-zikr menzili yine müteveffâ-i mezbûr İbrahim Çelebi’nin sulbî evlâdları Âişe ve Ümmügülsüm’e tevcîh ve ber-mûceb-i şart-ı vâkıf tasarruflarına izin vermeleriyle mâ-hüve’l-vâki‘ bi’t-taleb ketb olundu. Hurrire fî-gurreti Recebi’l-ferd sene [1]143. Şuhûdü’l-hâl: es-Seyyid Ahmed b. Mustafa, fahrü’l-kuzât Osman Efendi, Mehmed b. Abdullah ve Süleyman b. Abdullah.