Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 300 Hüküm no: 293 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bali b. Mustafa’nın ölmeden önce cariyesi olan Hadice bt. Abdullah’ı azat edip onunla evlendiği Havâs-ı Aliyye kazâsına tâbi‘ Otakçılar nâm mahalde Davudağa Mahallesi’nde sâkin iken bundan akdem fevt olan Ali Bâli b. Mustafa b. Mustafa’nın anası Havvâ Hatun b. Hasan meclis-i şer‘-i hatîr-i lâzımü’t-tevkīrde Hadice bt. Abdullah nâm hatun mahzarında üzerine takrîr-i da‘vâ ve tasvîr-i müdde‘â edip mezbûre Hadice oğlum müteveffâ-i mezbûrun câriye-i memlûkesi olup bi’l-verâse istirkāk murâd eylediğimde nefsini bana teslîmden imtinâ‘ eder suâl olunup rıkkıyeten bana itâ‘ata tenbîh olunmak bi’l-verâse matlûbumdur dedikde gıbbe’s-suâl mezbûre Hadice cevâbında bundan akdem müteveffâ-i mezbûr Ali Bâli’nin câriye-i memlûkesi olduğunu ikrâr lâkin târih-i kitâbdan bir sene mukaddem beni mâlından i‘tâk ve tahrîr ve ba‘dehû tarafımdan vekâleten beni kendiye sekiz bin akçe mehr-i müeccel ile akd ve tezvîc etmişidi hattâ batnımda müteveffâ-i mezbûrdan hamlim dahi olduğundan mâ‘adâ müteveffâ-i mezbûr hâl-i hayâtında ber-vech-i muharrer beni i‘tâk ve tezvîc eylediğini ikrâr dahi etmişidi deyü da‘vâyı def‘le mukābele edicek isre’l-istintak ve akībe’l-inkâr mezbûre Hadice’den def‘-i mezkûruna beyyine taleb olundukda udûl-i ahrâr-ı ricâl-i Müslimînden Mustafa Çelebi b. Hüseyin ve İbrahim Çelebi b. Davud ve es-Seyyid Ali b. Ahmed ve Feyzullah b. Ali nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka mahalle-i mezbûre sükkânından iken bundan akdem fevt olan Ali Bâli b. Mustafa b. Mustafa hâl-i hayâtında ve kemâl-i akl ve sıhhatinde târih-i kitâbdan bir sene mukaddem zâtı ma‘lûmumuz olan işbu mezbûre Hadice için câriye-i memlûkem olan Hadice bt. Abdullah’ı hasbeten lillâh mâlımdan i‘tâk ve tahrîr eylediğimden sonra tarafından vekâleten sekiz bin akçe mehr-i müeccel ile kendime akd ve tezvîc eyledim deyü ikrâr ve bizi işhâd eyledi bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ve şeyhülislâm -sellemehülâhü’l-melikü’l-allâm- hazretlerinden yedine verilen Zeyd müteveffânın veresesi Zeyd’in câriyesi Hind’i istirkāk murâd eylediklerinde Hind, Zeyd beni i‘tâk ve şu kadar akçe mehr-i müeccel tesmiyesiyle tezvîc edip hattâ i‘tâk ve tezvîc ettiğini sıhhatinde dahi ikrâr etmişidi deyü da‘vâ ve Zeyd’in ikrâr-ı meşrûhuna ikāmet-i beyyine edicek terekeden mehrini ve mâ‘adâdan hissesini almağa kādir olur mu? cevâb-ı bâ-savâblarından olur deyü buyrulan fetvâ-yı şerîfe mefhûmu üzere mezbûre Hadice’nin ıtk-ı verâsetine ba‘de’l-hükm müdde‘iyye-i mezbûre Havvâ Hatun bî-vech mu‘ârazadan men‘ olup mâ-hüve’l-vâki‘ bi’t-taleb ketb olundu. Hurrire fî-15 min-Cumâdelâhire sene [1]143. Şuhûdü’l-hâl: Diğer Mehmed Çelebi b. Abdullah, Mehmed Çelebi b. Abdullah, Salih Çelebi b. Süleyman, Abdullah Çelebi b. Hasan, İbrahim Çelebi b. Mehmed, Hoca Hasan Efendi b. Abdülmennan, Hüseyin Çelebi b. Süleyman.