Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 301 Hüküm no: 294 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hadice Hatun’un köleleri olan Gürcü asıllı Süleyman b. Abdullah ile karısı ve çocuklarını azat ettiği Mahmiye-i İstanbul’da Kabasakal Mahallesi sâkinelerinden fahrü’l-muhadderât Şerife Hadice Hatun bt. es-Seyyid İbrahim Efendi b. es-Seyyid Osman’ın zevci ve tarafından zikri âtî husûsu ikrâra vekîl-i müsecceli es-Seyyid Yusuf Efendi b. es-Seyyid Hasan nâm kimesne meclis-i şer‘-i hatîr-i lâzımü’t-tevkīrde müvekkilem mûmâ-ileyhâ Şerife Hadice Hatun’a rıkk-ı sâbıklarını mu‘terifeler olan orta boylu, çatık kaşlı, kara gözlü, kara kır sakallı Gürciyyü’l-asl Müslimü’l-mille ashâb-ı hâzihi’l-vesîka Süleyman b. Abdullah ve zevcesi olup kezâlik orta boylu, açık kaşlı, kara elâ gözlü, Gürciyyetü’l-asl Müslimetü’l-mille Ferruh bt. Abdullah ile mezbûr Süleyman’ın firâşından hâsıllar ve zevcesi mezbûreden mütevellidler olan evlâd-ı sıgārları Ali ve Şahin be-nâm-ı diğer Hüseyin ve Emine mahzarlarında bi’l-vekâle ikrâr-ı tâm ve takrîr-i kelâm edip zevcem müvekkile-i mûmâ-ileyhâ Şerife Hadice Hatun mevsûfûn-i mezbûrûndan her biri hasbeten lillâhi te‘âlâ ve taleben li-merzâti Rabbi’l-a‘lâ mâlından tahrîr ve i‘tâk ve sâir harâir-i asliyyîn zümresine idrâc ve ilhâk eyledi fîmâ-ba‘d mevsûfûn-i mezbûrûndan her biri sâir ahrâr-ı asliyyîn gibi hür olup üzerlerinde hakk-ı velâdan gayrı nesne hakkı kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Du‘âcı İbrahim b. Mustafa, Süleyman Çavuş b. Mustafa.