Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 301 Hüküm no: 295 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey’in bazı eşyalarını borcuna karşılık olmak üzere eşi Fâtıma bt. Hasan’a sattığı Bâ-imzâ-i efendi deyne takās. Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Mustafa Paşa-yı Atîk Câmi‘-i şerîfi kurbünde Arabacı Bayezid Mahallesi’nde sâkin umdetü’l-eşbâh ve’n-nezâir Abdullah Bey b. el-merhûm Mirza Mehmed Paşa’nın menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mûmâ-ileyh Abdullah Bey meclis-i ma‘kūd-ı mezkûrda zevce-i menkûhası bâ‘isetü’l-vesîka Fâtıma bt. Hasan nâm hatun mahzarında ikrâr ve takrîr-i kelâm edip eşyâ-i memlûkemden müsta‘mel on dört mor çiçekli kadife yastık ve yirmi köhne kutnî yastık ve on sekiz sâde Bursa kadifesi yastık ve üç köhne sûzenî mak‘ad ve altı köhne çuka mak‘ad ve altı köhne yemenî mak‘ad ve üç müsta‘mel Cezayir ihrâmı ve iki bâlin ve üç çuka kapı perdesi ve dört aba kapı perdesi ve iki ocak yaşmağı ve iki çuka seccâde ve iki döşek ve on sekiz sagīr ve kebîr minder ve bir köhne kaliçe ve bir orta zili ma‘a yan ve def‘a bir orta zili ve müsta‘mel dört Selanik keçesi ve kutnî ve şal ve yemenî dört yorgan ve üç velence mak‘ad ve altı kilim ve otuz pencere perdesi ve bir çalar asma sa‘at ve pirinç ve demir iki mangal ve yüz yirmi beş buçuk vakıyye evân-ı nuhâsiyyemi altı yüz guruşa zevcem mezbûre hatuna bi-safkatin vâhidetin bey‘ ve temlîk ve teslîm ve semen-i mezbûru mukaddemâ cihet-i karzdan kendiye zimmetimde edâsı lâzım deynim olan altı yüz guruşa takās ve mahsûb eylediğimde ol dahi ber-vech-i muharrer iştirâ ve temellük ve tesellüm ve mukāssa ve kabûl eyledi fîmâ-ba‘d eşyâ-i muharrere-i mezkûre zevcem Fâtıma Hatun’un mülk-i müşterâsı ve hakk-ı sırfı olup kat‘â benim alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Molla Ali b. Mahmud ve Osman b. Mehmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Hurrire fî-11 Recebi’l-ferd sene [1]143. Şuhûdü’l-hâl: Mustafa Ağa b. Ahmed, Molla Ali b. Mehmed, Halil Bey b. Abdullah, Berber Ahmed Çelebi b. Hüseyin, Mustafa Çelebi b. Ahmed, İsmail Ağa b. Abdürrezzak.