Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 302 Hüküm no: 296 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey’in evini geri almak şartıyla Yahûdi Yaves v. Avram’a sattığı Bâ-imzâ-i hazret-i efendi bey‘ bi’l-vefâ. Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Mustafa Paşa-yı Atîk Câmi‘-i şerîfi kurbünde Arabacı Bayezid Mahallesi’nde sâkin umdetü’l-eşbâh ve’n-nezâir Abdullah Bey b. el-merhûm Mirza Mehmed Paşa’nın zikri âtî menziline varıp zeyl-i sahîfede mektûbü’l-esâmî Müslimîn mahzarlarında akd-i meclis-i şer‘-i şerîf ettikde mûmâ-ileyh Abdullah Bey meclis-i ma‘kūd-ı mezkûrda Araboğlu demekle şehîr bâ‘isü hâze’s-sifr Çukacı Yasef v. Avram nâm Yahûdi muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mârru’z-zikr Arabacı Bayezid Mahallesi’nde vâki‘ bir tarafdan sâbıkā gümrük kâtibi merhûm Mehmed Efendi veresesi mülkleri ve bir tarafdan mahalle-i mezbûre imâmına meşrûta menzil ve bir tarafdan Bakkāl Mustafa menzili ve bir tarafdan tarîk-i âm ile mahdûd hâriciyye ve dâhiliyede fevkānî ve tahtânî büyût-ı adîde hamam ve bahçeyi muhtevî mülk menzilimi bi-cümleti’t-tevâbi‘ ve’l-levâhık mesfûr Çukacı Yasef’e bey‘ bi’l-vefâ tarîkı üzere dört bin guruşa bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûr dört bin guruşu mesfûr Yasef Yahûdi yedinden tamamen ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olan Molla Ali b. Mahmud ve Osman b. Mehmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Hurrire fî-10 min-şehri Recebi’l-ferd sene [1]143. Şuhûdü’l-hâl: Abdurrahman Bey b. el-merhûm Mirza Mehmed Paşa, Mustafa Ağa b. Ahmed, Molla Ali b. Mahmud, Halil b. Abdullah, İsmail Ağa b. Abdürrezzak, Osman b. Mehmed, Berber Ahmed b. Hüseyin, İbrahim Bey b. Hasan, Mustafa Çelebi b. Ahmed.