Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 304 Hüküm no: 298 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen İpekçi Süleyman Çelebi’nin vereseleri ile el-Hâc Abdülvehhab Ağa arasında bahçe satışı dolayısla olan davada sulh oldukları Mahmiye-i İstanbul’da el-Hâc Hasan Mahallesi ahâlîsinden iken bundan akdem vefât eden Gazzâz Süleyman Çelebi b. Salih b. Abdullah’ın verâseti zevce-i menkûha ve metrûkesi Hadice Hatun bt. Abdullah ile li-eb kız karındaşı Ümmühanî nâm hatuna münhasıra ve kable’l-kısme mezbûre Ümmühani dahi vefât edip verâseti zevc-i metrûku Ömer Efendi b. Mehmed ile sadrî kebîr oğlu Hüseyin ve âhar sadrî kebîr oğlu Osman nâm gāibe ve sadriye kebîre kızları Fâtıma ve Âişe nâm hatunlara münhasıra ve tashîh-i mes’elesi bi-tarîkı’l-münâsaha altmış dört sehmden olup sihâm-ı mezbûreden on altı sehmi mezbûre Hadice’ye ve on iki sehmi mezbûr Ömer Efendi’ye ve on ikişer sehmi dahi mezbûrân Hüseyin ve Osman’a ve altışar sehmi mezbûretân Fâtıma ve Âişe’den her birini isâbet ve intikāl etmekle bâ‘isetü hâzihi’l-vesîka mezbûre Hadice Hatun’un zevci ve tarafından zikri âtî husûsu taleb ve da‘vâ ve lede’l-iktizâ sulh ve ibrâya ve bunlar mütevakkıf olduğu umûrun küllîsine vekîl olduğu ve zât-ı mezbûreyi bi’l-ma‘rifeti’ş-şer‘iyye ârifân Mustafa Beşe b. Ahmed ve el-Hâc İbrahim b. Abdullah nâm kimesneler şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan İbrahim Odabaşı b. Abdullah nâm kimesne meclis-i şer‘-i hatîr-i lâzımü’t-tevkīrde es-Seyyid Abdullah Çelebi b. es-Seyyid Mehmed nâm kimesne mahzarında bi’l-vekâle ikrâr-ı tâm ve takrîr-i kelâm edip müteveffâ-i evvel mezbûrun sülüs mâlını vesâyâ-yı mu‘ayyenesine sarfa vasiyy-i muhtârı olmağla müteveffâ-i evvel-i mezbûrun ile’l-vefât binâsı yedinde mülk ve hakkı ve arsası merhûm Ak Şemseddin Vakfı’na senede iki yüz kırk akçe mukāta‘a-i kadîmeli mahalle-i mezbûrede vâki‘ etrâf-ı erba‘adan Derviş es-Seyyid Mustafa Efendi ve Solak Ahmed Ağa ve Âbide Hatun menzilleri ve tarîk-i âm ile mahdûd ve ma‘lûmü’l-müştemilât menzil tashîh-i merkūm üzere verese-i mezbûreye ba‘de’l-intikāl menzil-i mezbûr müteveffât-ı mezbûre Ümmühani Hatun’un zarûret-i deyni için bi’l-izni’ş-şer‘î mezbûre Ümmühani’nin düyûn-ı müsbetesini edâ ve gāib-i mezbûrun hisse-i irsiyyesini hıfza bâ-hüccet kezâlik vasiyy-i muhtârı olan işbu hâzır bi’l-meclis el-Hâc Ali b. Ömer ile mezbûr es-Seyyid Abdullah Çelebi’den her biri vesâyeten verese-i mezbûrûn taraflarından vekâleten menzil-i mezbûru gāib ani’l-meclis el-Hâc Abdülvehhab Ağa nâm kimesneye bey‘ eder olduklarında mârru’z-zikrin menzil-i mezbûrun hudûdu dâhilinde vâki‘ mârru’z-zikr el-Hâc Hasan Câmi‘-i şerîfinde imâm olanlara senede yüz altmış sekiz akçe mukāta‘a-i kadîmeli lede’l-ahâlî ve’l-cîrân ma‘lûmü’l-hudûd ve’l-mikdâr eşcâr-ı müsmire ve gayr-ı müsmire bahçe işbu yedimde olan mümzâ ve mahtûm bir kıt‘a mütevellî temessükü mantûku üzere zevcim müteveffâ-i mezbûrun ferağ ve kasr-ı yedinden tasarrufumda iken mezbûr Abdullah Çelebi sana iki yüz guruş verelim bahçe-i merkūm menzil-i mezbûr ile ma‘an bey‘ olundukda ziyâde kıymet bulur deyü müvekkilem mezbûreyi ıtmâ‘ ve bahçe-i mahdûd-ı mezbûru menzil-i merkūm ile ma‘an mezbûr el-Hâc Abdülvehhab Ağa’ya bin guruşa bey‘ ve kabz-ı semen ve semen-i mezbûrdan bahçe-i mezbûr için meblağ-ı mezbûr iki yüz guruşunu mezbûr es-Seyyid Abdullah Çelebi müstakilen ahz edip müvekkilem-i mezbûreye bir nesne teslîm etmeyip zimmetinde kalmağla ben dahi zevce-i müvekkile mezbûre tarafından vekâleten bahçe-i mahdûd-ı mezbûru mezbûr es-Seyyid Abdullah Çelebi hâzır olduğu hâlde hâlâ bahçe-i mezbûreye bi’l-iştirâ vâzı‘u’l-yed olan mezbûr el-Hâc Abdülvehhab Ağa’nın vekîl-i şer‘îsi işbu hâzır bi’l-meclis İbrahim Çelebi b. Abdullah nâm kimesne huzûr-ı şer‘a ihzâr ve ber-vech-i muharrer müdde‘âmı vech-i şer‘î üzere muvâcehesinde ba‘de’l-isbât ve’l-hükm beynimize muslihûn tavassut edip bahçe-i merkūm mezbûr el-Hâc Abdülvehhab Ağa yedinde kalmak üzere mezbûr es-Seyyid Abdullah Çelebi ile yüz guruşa beni inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu yedinden tamamen ahz u kabz edip husûs-ı mezbûra müte‘allika âmme-i da‘vâdan mezbûr es-Seyyid Abdullah Çelebi ile verese-i mezbûrûnu megāib-i [66a] mezbûr es-Seyyid Abdülvehhab Ağa’yı bi’l-vekâle ibrâ ve iskāt eylediğimde mezbûr es-Seyyid Abdullah Çelebi dahi bedel-i sulh-ı mezbûra müte‘allika âmme-i da‘vâdan beni ve zevcem müvekkile-i mezbûreyi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî-8 min-Recebi’l-ferd sene [1]143. Şuhûdü’l-hâl: Du‘âcı İbrahim b. Abdullah, Kasab Mustafa b. Ahmed, Mehmed Çelebi b. Osman, Molla Hüseyin b. Ahmed, Mehmed b. İbrahim.